Շատ է խոսվում Հայաստանի համար Սփյուռքի կարևորության մասին, այն մասին, որ Սփյուռքը Հայաստանի սպիտակ ոսկին է: Ի՞նչ գործընթացներով պետք է մեծանա Սփյուռքի ներգրավվածությունը և դերը Հայաստանի կյանքում: Անդրադառնալով «Առաջին լրատվական»-ի այս հարցին՝ Լոս Անջելեսի իրանահայերի միության գործադիր նախագահ Թոմիկ Ալեքսանյանը նշեց. «Խորհրդային Միության տարիներին նույնիսկ անպատկերացնելի էր, որ կարող ենք ճամփորդել, մեկնել հայրենիք: Բախտ վիճակվեց, տեսանք Հայաստանի անկախությունը և սկսեցինք գալ: Հավատացեք, այսքան տարի անցել է, բայց դեռ Սփյուռքը չի կարողանում ինչպես որ պետք է կողմնորոշվի, թե որն է իր դերը, բայց ամեն ջանք թափվում է: Սփյուռքի մեծամասնությանը չի հետաքրքրում իշխանությունն ով է, ինչ է, ավելի շատ ուզում են լինել ժողովրդի հետ, սատար կանգնել մեր պետականությանը և ենթակա լինել ժողովրդի կամքին: Չեն ուզում միջամտել որոշումների կայացմանը՝ դա թողնելով Հայաստանի ժողովրդին, որն ապրում է այս հողի վրա և ամբողջ դժվարություններն ու պարտականություններն իր վրա է վերցնում»:
Մեր զրուցակիցն ընդգծեց, որ եթե այն, ինչ ծրագրվում է և այն, ինչ խոստանում են ժողովրդին, իրականացվի 50-60 տոկոսով, ապա սփյուռքահայերի 20 տոկոսի վերադարձը հնարավոր է կլինի: Թոմիկ Ալեքսանյանը նաև հույս հայտնեց, որ հայ երիտասարդները կնվիրվեն տնտեսության այն ճյուղերին, որոնց պահանջարկը կա աշխարհում՝ ՏՏ ոլորտ, ռոբոտաշինություն, դեղագործություն…, և ժողովրդի կենսամակարդակը կբարձրանա:
Մանրամասն՝ տեսանյութում:
