Ավստրալիայի Վիկտորիա նահանգում հանցագործները գիշերը ներթափանցել են Բրայերսի տուն-թանգարան և Նապոլեոն Բոնապարտի անձնական իրերի հավաքածուից գողացել տասից ավելի ցուցանմուշ՝ հայտնում է ITAR-TASS-ը: Գողացված իրերի թվում են արծաթե թանաքամանը, ծխախոտատուփը, Նապոլեոնի խոպոպով մեդալյոնը, նաև ժապավեն, որի վրա նա հուշեր է գրել:
Ոստիկանությունը դեպքի վայր է հասել հսկման ազդանշանից 10 րոպե անց, բայց գողերը հասցրել են այդ ընթացքում փախչել: «Մենք ենթադրում ենք, որ հանցագործությունը լավ պատրաստված է եղել, գողերն իմացել են՝ ինչը որտեղ է, ինչը պիտի գողանան»,- ասել է խուզարկու Մայքլ Լեմը՝ քաղաքացիներին խնդրելով անմիջապես իրավապահներին տեղեկացնել գողոնի իրացման հնարավոր առաջարկների մասին: Նա նաև չի բացառել, որ գողությունն արվել է որևէ կոլեկցիոների պատվերով: Նապոլեոնի անձնական իրերի հավաքածուն հավաքել է նրա թոռնուհին՝ Մեյբել Բալկոմբ Բրուքսը:
«Մենք պարզապես հուսահատ ենք. գողացված իրերը անգին են, քանի որ դրանք հնարավոր չէ փոխարինել»,- ասել է թանգարանի վարիչ Սթիվ Յորքը:
