Երևանի Ընդհանուր իրավասության դատարանը, դատավոր Աննա Դանիբեկյանի նախագահությամբ այսօր մերժեց Ռոբերտ Քոչարյանի պաշտպանների հերթական միջնորդությունը գրավի դիմաց նրան ազատ արձակելու վերաբերյալ. երկրորդ նախագահը կմնա կալանքի տակ:
Ռոբերտ Քոչարյանը դատարանում հայտարարել է, որ ինքն այդ դատավարության ընթացքով ամենաշահագրգռված անձն է, որպեսզի բացահայտվի ճշմարտությունը: Բայց երկրորդ նախագահի փաստաբանների՝ խափանման միջոցի փոփոխության վերաբերյալ պերմանենտ միջնորդությունները թույլ չեն տալիս, որպեսզի սկսվի դատավարությունը, և դրա ընթացքը բերի ճշմարտության բացահայտման:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գերագույն մարմնի անդամ Հայկ Սահակյանը, վերլուծաբաններ Մհեր Ղալեչայնը և Նժդեհ Հովսեփյանը:
«Սահմանադրական դատարանն անընդհատ փորձել է օգնել Ռոբերտ Քոչարյանին, որովհետև նույն շղթայի տարբեր օղակներն են, այս անգամ էլ չստացվեց,- նշեց Մհեր Ղալեչյանը՝ հավելելով, որ հնարավոր է նոր միջնորդություն ներկայացվի՝ նոր հիմքերով: Վերլուծաբանի դիտարկմամբ՝ այս ամենի նպատակը դատավարության մեկնարկը ձգձգելն է, ժամանակ շահելը: Մհեր Ղալեչյանի խոսքով՝ Քոչարյանին բնորոշ չէ պատասխանատվություն ստանձնելու հատկանիշը, նա միշտ իրեն է վերագրել միայն հաջողությունները:
Հայկ Սահակյանը, անդրադառնալով Քոչարյանի հայտարարությանն այն մասին, թե ինքն է այդ դատավարության ընթացքով ամենաշահագրգռված անձը, ընդգծեց, որ երկրորդ նախագահն ընդամենը պոպուլիստական հայտարարություն է արել. «Ինչպե՞ս կարող է նա շահագրգռված լինել, որ օբյեկտիվ քննություն իրականացվի: Ճշմարտության բացահայտմամբ ամենաշահագրգռված կողմը քաղաքացիներն են և իշխող ուժը: Քոչարյանը և իր թիմը արհեստական խոչընդոտնր են ստեղծում և բուն պրոցեսը չի սկսվում: Քոչարյանն անկեղծ չէ իր հայտարարությունների մեջ»:
Նժդեհ Հովսեփյանը նույնպես ընդգծեց, որ միջնորդություններով դատավարության մեկնարկը անընդհատ ձգձգելու միտում կա. «Քոչարյանը չի ցանկանում, որ Մարտի 1-ի քրեական գործը մեկնարկի, հնչի մեղադրականը, և հանդես գան վկաները՝ իրենց ցուցմունքներով»:
«Դատն անխուսափելիորեն մեկնարկելու է, կարծում եմ՝ Քոչարյանը սկսելու է խոսել և մեղքը բարդելու է չորս անձանց վրա՝ Գորիկ Հակոբյանի, Հայկ Հարությունյանի, Գրիշա Սարկիսովի և Արմեն Երիցյանի,- ընդգծեց Նժդեհ Հովսեփյանը՝ հավելելով, որ Քոչարյանը հորինելու է պատմություններ և վերագրելու է մարդկանց, ովքեր չեն կարող հավաստել այդ ամենը:
Մանրամասն՝ տեսանյութում:
