Ապրիլի 13-ին Հանրապետական կուսակցության խորհրդի նիստում առաջադրվեց ՀՀ 13-րդ վարչապետը: Հովիկ Աբրահամյանի թեկնածությունն արդեն հաստատվել է:
«Առաջին լրատվական»-ի Realpolitik հաղորդաշարի հյուրն է «Դեմ եմ» նախաձեռնության անդամ Գևորգ Գորգիսյանը:
– Ըստ էության, նոր կառավարության առաջնահերթությունն է պարտադիր կուտակային համակարգի ներդրումը: Ի՞նչ եք Դուք մտածում:
– Նախորդ նախանիստում պարտադիր կուտակայինը արդեն ճանաչվել է հակասահմանադրական: Ամեն դեպքում նոր նախագիծ մշակելիս պետք է հաշվի առնվի Սահմանադրական դատարանի որոշումը, իսկ այնտեղ որոշ կետեր ճանաչվել են հակասահմանադրական:
– Այսինքն՝ վստա՞հ եք, որ նոր համակարգի նոր նախագիծ է քննարկվելու:
– Բնականաբար, պետք է քննարկվի, որովհետև Սահմանադրական դատարանը իր վճռով հարցը դրել է: Այս օրենքը ստեղծել է ինչ-որ իրավական վակուում՝ անորոշություն: Մինչև սեպտեմբերի 30-ը ժամկետ է դրված՝ տարբերակ մշակել և վերափոխել նաև մյուս այլ օրենքները, որոնք փոխկապակցված են այս օրենքի հետ:
Հիմա ես այս հարցը համարում եմ առաջնային, որին պետք է հրատապ լուծում տա առաջին հերթին նորընտիր վարչապետը: Դա այն խնդիրն է, որ մենք ՍԴ վճռից հետո բարձրացնում ենք, թե ինչու պետք է փոխանցեն քաղաքացիները գումարները, որը ստիպում են բարձրաստիճան պաշտոնյաները, և ինչպես պետք է դրանք վերադարձվեն: Բանից պարզվեց՝ այժմյան ԺՊ-ների մեջ չկար որևէ մեկը, որ պատասխանատվություն ստանձներ: Ուրախ կլինեի, որ վարչապետի առաջին քայլերից մեկը դա լիներ՝ հաշվի առնելով, որ նախագահը նաև անդրադարձել է այս թեմային, և քաղաքացիները շունչները պահած սպասում են դրան՝ արդյոք կշարունակե՞ն իրենցից ապօրինի գումարներ գանձել: Իսկ եթե վերադարձնելու են, ապա ինչ ճանապարհով և ինչպես:
– Որո՞նք են մարտավարական քայլերը, Ձեր շարժումը ինչպիսի՞ հարաբերություններ կունենա նոր կառավարության հետ:
– Նախ պետք է ապահովել քաղաքացիների սահմանադրական իրավունքները, և հետո նոր արդեն ժամանակը կգա խոսելու նոր օրենքի մասին, որովհետև քանի դեռ կան բաց վերքեր, դրանք պետք է փակել և շարժվել առաջ: Բաց վերքերով հեռուն չես գնա: Իսկ հիմա ժողովուրդը վերքեր ունի:
– Ակնհայտ է, որ այդ քաղաքականությունը մշակում և իրագործում է ՀՀ նախագահը, և ակնհայտ է, որ այս կառավարությունը ևս հետևելու է Սերժ Սարգսյանի հրահանգներին ու որոշումներին: Եվ այդ որոշումների մեջ է մտնում գանձումները շարունակելը:
– Կուտակային համակարգը շատ լավ համակարգ է, եթե այն գրագետ է մշակված և գրագետ է իրականացվում, որը այս դեպքում այդպես չէ: Ես կուզենայի նաև անդրադառնալ այն հարցին, որ շատ բարձր գնահատեցին նախորդ վարչապետի արածը, որը ինքնին ձախողել է: Ես չհասկացա՝ ինչ ձեռքբերում է նա ունեցել, և ինչու այդպես բարձր գնահատեցին. 10 տարի պետական միջոցները վատնել, քաղաքացիների կարծիքը հաշվի չառնել՝ սրանցից ո՞րն էր այդքան բարձր գնահատականի արժանի, և արդյոք այս ամբողջ ընթացքում նա դիվանագիտական հմտություններ ցուցաբերե՞լ էր նույն հենց երկխոսելու հետ կապված, որի համար էլ նրան դիվանագիտական աշխատանք են առաջարկել:
Ինձ թվում է՝ հիմա կա շատ մեծ խնդիր, և դա վստահության կորուստն է: Վստահությունը առհասարակ բացակայում է ոչ միայն կառավարության, այլև արդեն իսկ պետականության համակարգի և պետական հաստատությունների նկատմամբ: Եվ դա շտկելու համար պետք է պատիժներ լինեն: Եթե խոսվում է, որ պետական բյուջեն պետք է լինի անձեռնմխելի, ուրեմն պետական բյուջեն վատնողները պետք է պատժվեն, որպեսզի հաջորդը դա չանի:
