Վարչապետ Նիկոլ Փաշինյանն օրերս ընդունել է Հայաստանում ԱՄՆ դեսպան Լին Թրեյսիին, որին ուղեկցում էին ԱՄՆ Պետքարտուղարության Կովկասի և տարածաշրջանային հակամարտությունների գրասենյակի տնօրեն Շերիլ Ֆերնանդեսը, ԱՄՆ ՄԶԳ հայաստանյան առաքելության տնօրեն Դեբորա Գրիզերը, Հայաստանում ԱՄՆ փոխդեսպան Քրիստոֆեր Վ. Սմիթը և ՀՀ-ում ԱՄՆ դեսպանության քաղաքատնտեսական բաժնի ղեկավար Ռայան Քեմբլը:
Անդրադառնալով Հայաստան-ԱՄՆ գործընկերությանը՝ Նիկոլ Փաշինյանը նշել է, որ ՀՀ կառավարությունը ժողովրդավարական բարեփոխումների հավակնոտ օրակարգ ունի, հաստատակամ է այն կյանքի կոչելու հարցում և միջազգային գործընկերների, այդ թվում՝ ԱՄՆ օժանդակությունը էլ ավելի կխթանի դրանց հաջող իրականացումը:
Իր հերթին ԱՄՆ Պետքարտուղարության Կովկասի և տարածաշրջանային հակամարտությունների գրասենյակի տնօրեն Շերիլ Ֆերնանդեսը նշել է. «ԱՄՆ կառավարությունը սատարում է Հայաստանի ժողովրդավարական և տնտեսական բարեփոխումներին, հակակոռուպցիոն օրակարգին և տարածաշրջանային անվտանգության ջանքերին։ Հպարտությամբ վերահաստատում ենք մեր հարաբերությունները Հայաստանի հետ՝ շարունակելով ռազմավարական խորհրդակցություններն այս առանցքային հարցերի շուրջ»:
Հանդիպմանը քննարկվել է Հայաստան-ԱՄՆ գործընկերության օրակարգին և զարգացմանը վերաբերող հարցերի լայն շրջանակ: Անդրադարձ է եղել դատաիրավական, հակակոռուպցիոն, տնտեսական, օրենսդրական բարեփոխումների գործընթացում համագործակցության հնարավորություններին։
Ամերիկագետ Սուրեն Սարգսյանի կարծիքով՝ եթե Միացյալ Նահանգների հետ համագործակցությունը դիտարկենք տարածաշրջանային կոնտեքստում, ապա Միացյալ Նահանգները, ի տարբերություն Հայաստանի, Ադրբեջանի հետ ունի ակտիվ օրակարգ: «Ընդամենը օրեր առաջ Ադրբեջանի և Միացյալ Նահանգների պաշտպանության նախարարներն են հանդիպել և մի շարք ծրագրեր են քննարկել երկկողմ հարաբերությունների վերաբերյալ։ Վրաստանի հետ ևս բավականին աշխատում են՝ ԶՈՒ-երը, անվտանգության համակարգը՝ ևս։ Ինչ վերաբերում է Թուրքիային, ապա այսօր կա որոշակի լարվածություն, բայց այն ռազմավարական նշանակություն ունի Միացյալ Նահանգների համար, և այսօրվա վատ հարաբերություններն այսպես չեն մնա, բնականաբար կլինեն տեղաշարժեր դեպի հարաբերությունների ջերմացում։ Իրանը մշտապես գտնվում է Միացյալ Նահանգների թիրախում որպես թիվ մեկ թշնամի։ Այնպես որ՝ տարածաշրջանային տեսակետից առանձնապես բան չկա անելու և մանավանդ հաշվի առնելով, որ Հայաստանը ՀԱՊԿ անդամ է, Հայաստանում կա ռուսական ռազմաբազա, Հայաստանը ներգրավվածություն ունի Սիրիայում և այնտեղ ունի պաշտպանության նախարարության մասնագետներ՝ սա սահմանափակում է տարածաշրջանային համագործակցությունը Միացյալ Նահանգների հետ»,- «Առաջին լրատվական»-ի հետ զրույցում ասաց նա։
Ինչ վերաբերում է երկկողմ համագործակցությանը, ապա մեր զրուցակիցը դրա զարգացումը հնարավոր է համարում. «Միացյալ Նահանգները այս տարվա ընթացքում Հայաստանին տրամադրվող օգնությունը տարբեր ուղղություններով մեծացրել է, և կարծում եմ, որ այստեղ երկկողմ հարաբերությունների զարգացման հեռանկար կա»։
Մեր այն հարցին, թե ի՞նչ նշանակություն կարող է ունենալ այս հարցում Ամուլսարի խնդիրը, որն, ի դեպ, այս հանդիպման ընթացքում չի քննարկվել, Սուրեն Սարգսյանն արձագանքեց. «Միգուցե քննարկվել է, բայց պաշտոնական անդրադարձ չի եղել։ Կամ միգուցե Հայաստանի իշխանությունների դիրքորոշումը Ամուլսարի հարցում Միացյալ Նահանգների համար արդեն հասկանալի է, և այս պատճառով քննարկումներ չկան։ Համենայնդեպս, ցանկացած եղանակով խնդրի լուծումը Միացյալ Նահանգների ուշադրության կենտրոնում է գտնվելու, որովհետև Միացյալ Նահանգները սպասում է հստակ քայլերի, որպեսզի ամերիկյան բիզնեսը, ներդրումները ու մասնակիցները իրենց հետագա քայլերն իմանան»։
Արդյոք մեր իշխանություններն ունե՞ն պատրաստակամություն խորացնելու համագործակցությունը՝ հարցին Սուրեն Սարգսյանը պատասխանեց. «Ամեն ինչ ճիշտ է դիտարկել համեմատության մեջ. նորից համեմատության մեջ դիտարկենք՝ Ադրբեջանի պաշտպանության նախարարը հանդիպել է Միացյալ Նահանգների պաշտպանության նախարարին, բայց մեր պաշտպանության նախարարի հետ դեռևս հանդիպում չի եղել։ Հույս ունեմ, որ հանդիպումը դեռևս ծրագրավորման փուլում է։ Նաև ակտիվ շփումներ կան թե՛ Ադրբեջանի և թե՛ Վրաստանի պաշտոնյաների հետ։ Այս առումով նրանք ավելի առաջ են գնացել, ավելի օպերատիվ ու էֆեկտիվ են աշխատում Միացյալ Նահանգների հետ։ Բայց մեր մասով որոշակի դանդաղ պրոցեսներ կան, և դրանք պետք է հնարավորինս արագացնել։ Գործ ունենք աշխարհի թիվ մեկ տնտեսության ու գերտերության հետ, ու այդ իմաստով համագործակցությունը բոլոր ոլորտներում, այդ թվում՝ տնտեսության ոլորտում, չափազանց կարևոր է Հայաստանի համար»։
