Ռոբերտ Քոչարյանի աջակիցները Հայաստանի մարզերում ստորագրահավաք են սկսել՝ հաջակցություն իրենց պաշտպանյալի: Թվում է՝ Ռոբերտ Քոչարյանը գնում է հանրային աջակցություն ստանալու ճանապարհով, թեպետ առաջին հայացքից տպավորություն է, որ ստորագրություն անցկացնողներն ավելի շատ են, քան ստորագրելու պատրաստակամություն հայտնող մարդիկ։ Երկրորդ նախագահի այս հայտարարությունը նաև ուշագրավ է երրորդ նախագահ Սերժ Սարգսյանի այն հայտարարության ֆոնին, թե մոտենում է հանրության հետ անկեղծ խոսելու ժամանակը։ Փաստացի ստացվում է՝ նախկին նախագահներն առաջիկայում կփորձեն իրենց գործունեությունը ծավալել հանրային ինչ-որ շերտերի աջակցության վրա հույս դնելով։
«Ժողովրդավարական հայրենիք» կուսակցության նախագահ Պետրոս Մակեյանն «Առաջին լրատվական»-ի հետ զրույցում ասաց՝ նախկինների նկատմամբ շատ բան չի փոխվել, առկա են նույն տրամադրությունները. «Ատելություն, ամենամեղմ ձևակերպմամբ՝ զզվանք։ Իրենք պարզապես հույսը դրել են փողի վրա, որ ունեցած մեծ ռեսուրսներով, մեդիա դաշտով քարոզչություն իրականացնելով՝ փորձում են ժողովրդին գնել, որ հանրային աջակցության իմիտացիա ստեղծեն»։
Մակեյանը միևնույն ժամանակ ընդգծեց. «Ցավոք, նոր իշխանությունները չեն սահմանափակել նախկինների փող աշխատելու հնարավորությունները, և այդ աշխատած փողերը նրանք ներդնում են քարոզչության, ժողովրդին գնելու ու լոկալ խնդիրներ լուծելու վրա։ Չեմ կարծում՝ նրանց շատ աջակցողներ լինեն, կլինեն ընդամենը լոկալ խառնակչություններ։ Բայց փաստ է, որ նորերը նրանց փող աշխատելու հնարավորությունից չեն զրկել»։
Ըստ մեր զրուցակցի՝ երկրորդ և երրորդ նախագահները թեպետ հիմա առանձին են գործում, ինչ-որ պահի, իրենց շահերից բխելով, կարող է միավորվեն։
Քաղաքագետ Գագիկ Համբարյանի կարծիքով՝ նախկին իշխանությունները գնում են հասարակության կարծիքը զոնդաժի ենթարկելու ճանապարհով: «Այսինքն՝ փորձելու են այս ստորագրահավաքի միջոցով ճշտել, թե իրականում իրենք հասարակության աջակցությունն ունե՞ն, թե՞ ոչ՝ գոնե այն մարդկանց, որոնք նախկինում իրենց սատարել են։ Բացի այդ՝ աջակցություն կարող է և լինել, բայց եթե իրենք փորձեն այս մեթոդով ճշտել աջակցության չափերը, կարող է և խաբկանք լինել, որովհետև շատ դեպքերում հիմա, հատկապես հետհեղափոխական էյֆորիայի ֆոնին, գուցեև չեն աջակցում նոր իշխանություններին, բայց կխուսափեն բացահայտ իրենց կարծիքն արտահայտել։ Ես չեմ կարծում, որ այս ստորագրահավաքի միջոցով հնարավոր կլինի ճշտել հասարակության կարծիքը նախորդ իշխանությունների նկատմամբ՝ հաշվի առնելով այն քաղաքական իրավիճակը, որ Հայաստանում կա այս փուլում»,- «Առաջին լրատվական»-ի հետ զրույցում ասաց նա։
Ըստ Համբարյանի՝ քանի որ այսօր քաղաքական դաշտում չկա նոր, առողջ ընդդիմություն, ինքնըստինքյան իշխանություններից դժգոհ հատվածին իրենց շուրջը փորձում են համախմբել նախկին իշխանության ներկայացուցիչները. «Նոր ուժերի մասին այս պահին խոսք լինել չի կարող։ Բայց ինչու ոչ՝ նաև ԲՀԿ-ն կարող է իր շուրջը համախմբել, նրանց խիստ քննադատությունը այս իշխանությանը հենց դրան է ուղղված։ Քաղաքական պայքարում դա շատ ընդունված երևույթ է։ Կան նախորդ իշխանությունները, խորհրդարանական ընդդիմադիր ուժերը, և չկան նոր քաղաքական ուժեր, որոնք իրենց կողմը կգրավեն այս իշխանություններից դժգոհ զանգվածին. շատ նորմալ է այն հանգամանքը, որ նախորդ իշխանությունների ներկայացուցիչները ևս կփորձեն այդ դժգոհ մասսային իրենց կողմն ուղղորդել»։
Լուսանկարը՝ Photolure-ի
