Հոկտեմբերի 24-ին կառավարության նիստում ի թիվս այլ հարցերի կառավարությունը քննարկեց ու հավանության արժանացրեց գյուղատնտեսության ոլորտում ապահովագրական համակարգի ներդրման պիլոտային ծրագիրը, որը նախատեսում է պետական աջակցություն ցուցաբերել գյուղատնտեսներին՝ ապահովագրական համակարգի ներդրման միջոցով։
Գյուղատնտեսությունն ապահովագրողների ազգային գործակալության գործադիր տնօրենի տեղակալ Նարեկ Հովակիմյանը «Առաջին լրատվական»-ի հետ զրույցում տեղեկացրեց, որ թեև կառավարությունն այս ծրագիրը հաստատել է հոկտեմբերի 24-ին, սակայն գյուղատնտեսության ապահովագրության պայմանագրերի վաճառքը սկսվել է սույն թվականի սեպտեմբերի 30-ից։
«Այս ծրագիրը կյանքի է կոչվել հայ-գերմանական համագործակցության շրջանակներում, ըստ որի նախատեսվում է, որ այն գյուղատնտեսները, որոնք ձեռք կբերեն գյուղատնտեսության ապահովագրության պայմանագիր, ապա այդ պայմանագրի 50 տոկոսը կսուբսիդավորվի կառավարության կողմից։ Այս ծրագրով կառավարությունը նպատակ ունի խթանել գյուղատնտեսության կայուն զարգացմանը և ստեղծվի մի այնպիսի համակարգ, որով գյուղացին վստահ կլինի, որ ցրտահարության, կարկուտի կամ հրդեհի ժամանակ՝ իր կրած կորուստների դիմաց նա կստանա փոխհատուցում և մենակ չի մնա իր պրոբլեմի հետ»,- նշեց Նարեկ Հովակիմյանը։
Վերջինիս փոխանցմամբ՝ ծրագրի իրականացման այս փուլում ապահովագրվելու է երկու մշակաբույս՝ ծիրանը և խաղողը, իսկ հետագայում ավելանալու են նաև դեղձը, խնձորը և հացահատիկային մշակաբույսերը։ Ապահովագրությունն իրականացվելու է «Ռոսգոսստրախ Արմենիա», «Սիլ Ինշուրանս» և «Ինգո Արմենիա» ապահովագրական ընկերությունների միջոցով։
Հարցին՝ ինչո՞ւ են միայն այս երեք ապահովագրական կազմակերպություններն ընտրվել , Նարեկ Հովակիմյանը պատասխանեց․
«Նրանց մենք չենք ընտրել, այլ այս երեք ընկերություններն են համաձայնել մասնակցել գյուղատնտեսության ապահովագրությանը, մենք Հայաստանում գործող ապահովագրական բոլոր վեց կազմակերպությունների հետ էլ քննարկել ենք, բայց վերոնշյալ երեքն են որոշել ապահովագրել գյուղատնտեսությունը։ Ներկա դրությամբ արդեն իսկ ունենք շահառուներ Կոտայքի, Արագածոտնի և Վայոց ձորի մարզերից»։
Հովակիմյանն ընդգծեց նաև, որ ծրագրի հաջողությունը կախված է միայն գյուղատնտեսների ակտիվությունից ու հնարավորինս շատ թվով շահառուների ներգրավվածությունից։
Մանրամասները՝ տեսանյութում։