Թերթը գրում է, որ Ադրբեջանի նախագահ Իլհամ Ալիևը կառավարության նիստից հետո անդրադարձել է Արցախի հիմնախնդրին, մասնավորապես՝ Հայաստանի և Ադրբեջանի միջև ընթացող բանակցություններին.
«Անդրադառնալով Մադրիդյան սկզբունքներին՝ նա նշել է, որ այդ հարցում չպետք է լինեն անհամաձայնություններ և կասկածներ. «Կարծում եմ՝ եկել է ժամանակը, երբ պետք է այդ մասին բարձրաձայն խոսենք: Այդ սկզբունքներով նախատեսվում է Ադրբեջանի 5 շրջաններից դուրս բերել հայկական զորքերը: 6 տարի անց դրանք դուրս կբերվեն նաև 2 շրջաններից: Տեղի բնակչությունը ետ կվերադառնա հայրենի տներ, իսկ Արցախին կտրվի ժամանակավոր կարգավիճակ: Ինչպես ադրբեջանական, այնպես էլ հայկական բնակչության անվտանգությունը կապահովեն խաղաղապահ ուժերը»,- ասել է նա:
Ալիևը նաև նշել է, որ կարող է ընդունվել Հայաստանին և Արցախին միջանցք տրամադրելու առաջարկը:
«Ինչ վերաբերում է Լեռնային Ղարաբաղի կարգավիճակի սահմանմանը, 2009-ի սկզբունքներում նշված էր, որ դա ապագայի խնդիր է, և կողմերի համաձայնության դեպքում այն կարող է գտնել իր լուծումը: Ես բազմիցս հայտարարել եմ ու այսօր էլ ուզում եմ ասել, որ Ադրբեջանից Լեռնային Ղարաբաղի անջատումը, ԼՂ-ին անկախության տրամադրումը կամ Հայաստանին նրա միացումը երբեք չի եղել ու չի լինի բանակցությունների թեմա»,- ասել է Ալիևը և հավելել, որ հայկական կողմը նորից սպառնում է Ադրբեջանին պատերազմով:
«Նրանք սարսափում են պատերազմից և, միաժամանակ, մեզ սպառնում են պատերազմով: Մենք զարգանում ենք, ուժեղանում, մեր ժողովուրդը հարստանում է, իսկ նրանք ապրում են կարիքի մեջ: Վերջին վեց ամսվա ընթացքում այդ երկիրը լքել է 70 հազարը, իսկ 5-10 տարի անց այնտեղ կմնա 1 միլիոնից քիչ մարդ։ Երբ մեր ազգաբնակչությունը կլինի 11 միլիոն, նրանցը կդառնա 1 միլիոն: Բոլորը շատ լավ հասկանում են, թե դա ինչ է նշանակում: Մենք կարող ենք այդ ճանապարհով լուծել հարցը: Այդ իսկ պատճառով միջազգային հանրության ակտիվության պատճառներից մեկը հենց այն է, որ հարցը արագ լուծվի: Մենք էլ ենք դա ուզում: Բայց, կրկնում եմ, Մինսկի խմբի կողմից ներկայացված առաջարկությունների հիման վրա»,- ասել է նա:
