Մի օր կգաք ինձ մոտ, ցույց կտամ այն ամենը, ինչով խախտում եք տարրական լրագրողական էթիկան». Տիգրան Հակոբյանը՝ լրագրողին

Հանրային հարթակում մտահոգություններ կան «Հեռուստատեսության եւ ռադիոյի մասին» օրենքի հետ կապված, առ այն, որ դա մասնավոր հեռուստաընկերություններին կարող է կանգնեցնել մեծ պրոբլեմի առաջ եւ մենք կվերադառնանք բրեժնեւյան ժամանակներին, երբ եթերում կար ընդամենը մեկ ալիք եւ այդ ալիքը պետական էր: ՀՌՀ նախագահ Տիգրան Հակոբյանն այսօր լրագրողների հետ զրույցում ասաց, որ Հայաստանում բացի պետական մուլտիպլեքսից, լինելու է մասնավոր մուլտիպլեքս. «Ցավոք, ներկա օրենքում այդ մուլտիպլեքսը կառուցելու համար այնպիսի պայմաններ են դրված, որը ներդրողների համար շահավետ չի: Պետք է ավելի մեղմ պայմաններ սահմանել ե՛ւ պետտուրքի, ե՛ւ Հայաստանի ծածկման առումով, որ այս ոլորտ գան մասնավոր ներդրողներ: Այսօր արդեն մշակվող օրենքում այդ հնարավորությունը կստեղծվի, որ Հայաստանում գործի եւս մեկ մուլտիպլեքս: Շատ ժամանակ խոսում են մի քանի մուլտիպլեքսի մասին, բայց պետք է հիասթափեցնեմ: Խնդիրը իշխանությունների ոչ հոժարակամ վերաբերմունքի մեջ չի, խնդիրն այն է, որ Հայաստանը չունի այդ չափի հաճախականություններ, որպեսզի կարողանա մի քանի մուլտիպլեքս ունենա: Մենք պատերազմող երկիր ենք, արտաքին վտանգների առնչվող, մեր մոտ դիապազոնների մի մասը հատուկ ծառայություններինն է, կամ ՊՆ աշխատակիցներինը: Բայց մեկ մասնավոր մուլտիպլեքս պետք է ունենանք, որտեղ կհեռարձակվեն այն ԶԼՄ-ները, որոնք մրցույթը չեն հաղթահարել ու չեն կարող թվային պետական մուլտիպլեքսով հեռարձակվել: Հանրային թվային մուլտիպլեքսում հեռարձակվելու համար բոլոր հեռուստաընկերությունները, որոնք պատրաստ են, ցանկություն ունեն հեռարձակվելու, պետք է համապատասխանեն շատ հստակ չափորոշիչների՝ պետք է հանրօգուտ ծրագրեր հեռարձակելու պարտավորություն ունենան»: Լրագրողները հարցրեցին Ստյոպա Սաֆարյանի՝ որոշ ԶԼՄ-ների առջեւ դրած արգելքից: Տիգրան Հակոբյանը պատասխանեց. «Ես իմ եզրակացությունն ասել եմ, ավելացնելու բան չունեմ, բայց դա չի նշանակում, որ ես ողջունում եմ Թիվի 5-ի որդեգրած քաղաքականությունը»: Նա ասաց, որ ցանկացած քաղաքակիրթ երկրում ցանկացած հեռուստաընկերության լրատվական հաղորդումները համապատասխանում են որոշ օբյեկտիվ ստանդարտների՝ չեզոքության, օբյեկտիվության եւ այլն: Դիտարկմանը, որ եթե ԶԼՄ-ն ապատեղեկատվություն է տարածում, թող դատի տան՝ նա պատասխանեց, որ ամեն ինչ դատի տալով չի: Թիվի 5-ի լրագրողը հետաքրքրվեց՝ ե՞րբ եւ ինչպե՞ս են խախտել այդ ստանդարտները, ապատեղեկատվություն ե՞րբ են տարածել, որեւէ օրինակ կարո՞ղ է ասել՝ Տիգրան Հակոբյանը պատասխանեց. «Եթե ուզում եք իմանալ, մի օր կգաք ինձ մոտ, ես ձեզ ցույց կտամ այն ամենը, ինչով դուք խախտում եք տարրական լրագրողական էթիկան»: