Թաիլանդի ծովափնյա շելֆի ծանծաղուտ վայրում կառուցվելու է նոր քաղաք: Այս մասին Bangkok Post հրատարակությանը տված հարցազրույցի ժամանակ ասել է երկրի նախկին վարչապետ Թաքսին Չինավատը: Նրա խոսքերով, Սիամի նեղուցում՝ ափից 10 կմ հեռավորության վրա ծրագրի իրականացման համար կառուցվել է ամբարտակ: Դա թույլ կտա չորացնել 300 քառակուսի կմ տարածք, որի վրա էլ կտեղակայվի նոր քաղաքը:
Ինչպես նշել է Չինավատը, մեգապոլիսում, մասնավորապես, տեղակայվելու են բնակելի տներ, բիզնեսի համար նախատեսված օբյեկտներ, Ասիական ֆինանսական կենտրոնը, ծրագրային ապահովման ստեղծման միջազգային կենտրոնը, կինոստուդիա և նոր նավահանգիստներ: Այն նախատեսվում է ամբողջությամբ կանաչապատել, իսկ էլեկտրաէներգիան կստացվի քամու միջոցով:
Չինավատը այդ քաղաքի կառուցումը գնահատել է 105 դոլար յուրաքանչյուր քառակուսի մետրի համար: Անշարժ գույքի մի մասը հետագայում պլանավորվում է վաճառել: Միլիարդատեր և Թաիլանդի նախկին վարչապետ Թաքսին Չինավատը ներկա պահին գտնվում է Դուբայում՝ արտաքսման մեջ: Նա այն կուսակցության հիմնադիրն է, որը նրա կրտսեր քրոջ՝ Յինգլաք Չինավատի գլխավորությամբ այս տարվա հուլիսին հաղթանակ է տարել երկրի պառլամենտական ընտրություններում:
