Միջազգային բորսաներում, հայկական շուկայում ալյուրի գնի տատանումները և հացի գնի ներկայիս անփոփոխ մնալը «Առաջին լրատվականի» հետ զրույցում պարզաբանեց տնտեսական մրցակցության պաշտպանության պետական հանձնաժողովի մամուլի և հասարակայնության հետ կապերի բաժնի պետ Գայանե Սահակյանը՝ տեղեկացնելով, որ հանձնաժողովը հետևում է հայաստանյան գնաշուկայում պարենային ապրանքների գնային տատանումներին՝ իրականացնելով ամենօրյա մոնիտորինգ։
«Համաձայն իրականացրած մոնիտորինգների՝ կարող եմ ասել, որ, մայիսի 30-ի դրությամբ, 1 պարկ միջին որակի ալյուրը՝ 50 կգ, արժեցել է 12 հազար դրամ, իսկ այսօրվա տվյալների համաձայն՝ ալյուրի գնում կա 6 տոկոսի տարբերություն, այսինքն՝ նույնքան ալյուրն արժե 11 հազար 230 դրամ»,- նշեց Գ.Սահակյանը՝ հույս հայտնելով, որ ալյուրի գինը կշարունակի նվազել, քանի որ սեպտեմբեր, հոկտեմբեր, նոյեմբեր ամիսների ընթացքում նախատեսվում է արդեն միջազգային բորսաներում նվազած ալյուրի գնով ալյուր ձեռք բերել։ Նրա հավաստմամբ՝ սա կբերի նաև հացի գնի էական նվազման։ Հասարակայնության հետ կապերի բաժնի պետը տեղեկացրեց նաև հացի գնի տվյալները, որոնք, մոնիտորինգի արդյունքներով, ոչ մեծ պարենային խանութներում նվազել են 10 դրամով, իսկ սուպերմարկետներում մնացել են անփոփոխ։
«Մենք չենք կարող վերահսկել հացի գնաշուկան, քանի որ կան հարյուրավոր հացարտադրող կազմակերպություններ, որոնց բոլորին վերահսկելն անհնար է»,- ընդգծեց Գ.Սահակյանը՝ հավելելով, որ նախընտրում են ալյուրն առավել նվազ գնով և լուրջ քանակով ձեռք բերել, որն էլ կբերի հացի գնի էական նվազման։
