Հոլիվուդի ամենառոմանտիկ զույգերից մեկը՝ Շոն Փենը և Շարլիզ Թերոնը, դատելով ամեն ինչից, չեն կարող առանց իրար թեկուզ և մեկ օր ապրել: Քիչ է, նրանց միասին նկատում են գնումներ կատարելիս, զբոսնելիս և հանգստանալիս, այժմ էլ սիրահարները որոշել են չբաժանվել նաև նկարահանման հրապարակում: Ամերիկյան Deadline պորտալը հաղորդում է, որ Շոն Փենը պատրաստվում է իր սիրելիին նկարել նոր ֆիլմում:
Նկարահանումները Աֆրիկայում կկայանան, և այժմ թույլտվության են սպասում, որ վերջապես սկսեն աշխատանքները: Փենի նոր ֆիլմում Թերոնը բժշկի դեր կխաղա, որին Աֆրիկա են ուղարկել տեղի բնակիչներին հումանիտար օգնություն ցուցաբերելու համար: Այնտեղ նա հանդիպում է իր կոլեգային, որի դերը կատարում է Խավիեր Բարդեմը: Ֆիլմը կպատմի սիրո դժվար պատմության մասին, որ զարգանում է քաղաքական և հասարակական թեժ հակամարտությունների ֆոնին: Ֆիլմում նկարահանվելու է նաև Ադել Էկզարկոպուլոսը:
Թերոնի համար այս նկարահանումները հայրենիքում կանցկացվեն, քանի որ նա ծնվել է աֆրիկյան Բենոնի քաղաքում:
Երկար ճանապարհորդությունից առաջ Փենն ու Թերոնը զբաղվել են իրենց տան հարդարմամբ: Դերասանները ողջ աշխարհով մեկ հետաքրքիր կտավներ և առարկաներ են հավաքում: Փենը իր տունը պարսպապատել է, որպեսզի կողմնակի աչքերից հեռու պահի իր ընտանիքը:
