Սևանում իշխանի պաշարների ավելացման նպատակով ցանցավանդակների կառուցման ծրագրի ազդեցությունը միանշանակ չէ. այն ունի իր դրական և բացասական կողմերը: Այսօր լրագրողների հետ հանդիպմանը ՀՀ ԳԱԱ հիդրոէկոլոգիայի և ձկնաբուծության կենտրոնի տնօրեն Բարդուխ Գաբրիելյանը նշեց՝ ծրագրի դրական կողմն այն է, որ վերջապես կլուծվի իշխանի պաշարների վերականգնման հարցը. Սևան բաց կթողնվեն ստուգված մայր ձկներ, որոնք բացառվում է, որ հիբրիդներ լինեն՝ միայն մաքուր իշխաններ պիտի լինեն:
Ըստ բանախոսի՝ սա կնվազեցնի որսագողությունը, քանի որ հսկողություն կիրականացվի: Ծրագիրը, սակայն, կարող է նաև բացասաբար ազդել. Սևան կլցվեն օրգանական նյութեր, որոնք իրենց հերթին բացասական ազդեցություն կարող են ունենալ Սևանի բաղադրության վրա, թեև անհրաժեշտ նորմերը պահպանելու դեպքում Սևանը չի տուժի:
Գաբրիելյանը նշեց, որ այդ օրգանական նյութեր պարունակող ձկան կերը չի կարող ուտել սիգը, քանի որ դա նստում է ջրի հատակին: Կենտրոնի տնօրենը ներկայացրեց դեկտեմբերի տվյալները, ըստ որոնց՝ Սևանում ձկնային պաշարները կազմել են 324 տոննա:
«Սա, իհարկե, ավելացում է, բայց ոչ այնքան, որ պոպուլյացիան համարենք վերականգնված: Ձկնային պաշարների մաքսիմումը եղել է 1989-1991թթ., երբ եղել է 28-30 հազար տոննա սիգ: Ներկայում սիգը 324 տոննա է՝ դրան գումարած մոտ 100 տոննա այլ տեսակի ձկներ, որի հիմնական մասը լճածածանն է: Շուկայում վաճառվողը Սևանի սիգն է: Սիգ կար նաև Կեչուտի ջրամբարում, սակայն այնտեղ հիմա նման պաշարներ չկան, որ վաճառքի հանեն»,- ասաց նա:
Գաբրիելյանը մտահոգիչ համարեց մեկ փաստ ևս. եթե անգամ ձուկը հնարավորություն ունենա փախչելու, ձվադրելու տեղ չունի, ինչը որսագողությանը հավասար վնաս է: Կենտրոնի տնօրենը նշում է՝ ի տարբերություն որոշ բնապահպանների, ովքեր ասում են՝ «ոչ» ու ոչինչ չեն առաջարկում, իրենք ունեն կոնկրետ, հստակ առաջարկ. առաջարկում են կիսաարհեստական եղանակով ձկնային պաշարների ավելացում: Նրա խոսքով՝ այս մեթոդը կիրառվել է Խորհրդային Միության ժամանակ, դրա հաշվին էլ պոպուլյացիան պահպանվել է:
