Լեոնարդո դա Վինչիի «Աշխարհի փրկիչը» նկարը, որը մինչև վերջին ժամանակները համարվում էր կորած, 2011 թ.-ի նոյեմբերին կցուցադրվի Լոնդոնի Ազգային ցուցասրահում: «Աշխարհի փրկիչը» թվագրվում է մոտավորապես 1500-ական թվականներով և պատկերում է Հիսուս Քրիստոսին, որը աջ ձեռքով օրհնում է, իսկ ձախ ձեռքով բռնել է թափանցիկ գունդը: Թանգարանում այն կցուցադրվի «Լեոնարդո դա Վինչի. Միլանի պալատական նկարիչ» ցուցադրության շրջանակներում, որը բացվում է նոյեմբերին 9-ին: Այս մասին հայտնում է BBC հեռուստաալիքը:
Յուղաներկ այս նկարի մասին հայտնի է եղել, սակայն մասնագետները երկար ժամանակ չէին կարողանում պարզել նրա գտնվելու վայրը և կարծում էին, որ այն ոչնչացվել է: 17-րդ դարի կեսերին այն եղել է Կառլ Առաջինի հավաքածուի մեջ, սակայն 1763 թ.-ին հանվել է վաճառքի Բուքինգհեմի դքսի կողմից, ինչից հետո նրա մասին որևէ տեղեկություն չի եղել մինչև 1900 թ.-ը, երբ հայտնվել է բրիտանացի կոլեկցիոներ սըր Ֆրեդերիկ Կուկի մոտ:
Կուկի հետնորդները չեն իմացել, որ նկարը դա Վինչիինն է, և այն 1958 թ.-ին վաճառել են 45 ֆունտով: Կտավը գնել է մշակութային իրերի վաճառքով զբաղվող մի մասնագետ:
Եվ միայն 2010թ.-ին բարդ վերականգնողական աշխատանքներից հետո է մասնագետների խումբը հաստատել այդ նկարի՝ Դա Վինչիի վրձնին պատկանելու փաստը: Այժմ նկարը գնահատվում է 200 միլիոն դոլար:
