Բագրատաշեն-Սադախլո պետական սահմանի անցման կետի վերազինման նպատակով Եվրոպական միության ֆինանսավորմամբ նոր ծրագիր է մեկնարկել, որի բյուջեն շուրջ 4 միլիոն 300 հազար եվրո է: Ծրագիրը նպատակ ունի հայ-վրացական պետական սահմանի «Բագրատաշեն» և «Սադախլո» անցման կետերում ներդնել սահմանների համալիր կառավարման եվրոպական չափանիշեր, որոնք ուղղված կլինեն միջազգային առևտրի և տարանցիկ փոխադրումների խթանմանը, ինչպես նաև մարդկանց միջսահմանային շարժի դյուրացմանը:
«Ծրագրի ներդրումը նպաստելու է նաև սահմանային անցակետերին մոտ գտնվող գյուղերի տնտեսական վիճակի լավացմանը»,- այս մասին համաժողովի ժամանակ լրագրողների հետ զրույցում ասաց Հայաստանում ՄԱԿ-ի Զարգացման ծրագրի մշտական ներկայացուցիչ Բրեդլի Բուզետտոն:
Ծրագրի շրջանակներում նախատեսվում է անցակետերը համալրել նաև համապատասխան տեխնիկայով՝ ռենտգենաճառագայթային սարքավորումներով, կենսաչափական անձնագրերի ընթերցման սարքերով, իսկ մնացած գումարը կծախսվի ծրագրի կառավարման և անցակետերում աշխատող երկու երկրների աշխատակիցների վերապատրաստման համար:
Նշենք, որ սա սահմանային անցակետերի մասով ԵՄ-ի աջակցությամբ և ՄԱԶԾ-ի կողմից իրականացված արդեն երրորդ ծրագիրն է:
Համաժողովին ներկա էր նաև ՀՀ ՊԵԿ նախագահ Գագիկ Խաչատրյանը, որն իր խոսքում նշեց, որ Հայաստանը այս ծրագրի իրականացման գործընկերն է, գլխավոր շահառուն և ուշադրությամբ հետևում է ծրագրի իրականացման ժամանակացույցին:
ԵՄ դեսպան Տրայան Հրիստեան ևս ողջունեց Հայաստանի և Վրաստանի համապատասխան մարմինների հանձնառությունը՝ ուղղված երկու երկրներում սահմանների համալիր կառավարման համակարգերի ներդրմանն ու զարգացմանը՝ ավելացնելով, որ իրենք նման ծրագրերն օգտավետ ենք համարում նաև Հարավային Կովկասի համար:
