Վաշինգթոնը «խոշորագույն աշխարհաքաղաքական անհաջողակ» դարձավ Ռուսաստանի և Թուրքիայի նախագահներ Վլադիմիր Պուտինի և Ռեջեփ Էրդողանի կողմից Սիրիայի վերաբերյալ համաձայնագրի կնքումից հետո: Այսպիսի եզրահանգման են եկել ամերիկյան CNN հեռուստաալիքի լրագրողները:
«Պուտինն ասել է, որ Ռուսաստանը և Թուրքիան համաձայնության են եկել Սիրիայի ինքնիշխանության ու տարածքային ամբողջականության աջակցության հարցում, ինչը կարելի է մեկնաբանել որպես արտաքին քաղաքականության հաջողություն»,- գրում է հոդվածի հեղինակը:
Լրագրողը Միացյալ Նահանգների համար նվաստացուցիչ է անվանել Մոսկվայի և Անկարայի միջև գործարքը, ինչպես նաև «ամերիկյան զորքերի արագ դուրս բերումը և քրդերին վտանգի տակ թողելը»: Նա հիշեցրել է, որ հենց Ռուսաստանն է նպաստել Թուրքիայի և պաշտոնական Դամասկոսի միջև երկխոսության սկսմանը: CNN-ում փաստել են, որ Պուտինը և Էրդողանը դարձել են տարածաշրջանի հիմնական աշխարհաքաղաքական միջնորդները, և ամերիկացիների համար պարզապես «տեղ չկա Սիրիայի ապագայի ձևավորման գործընթացում»:
Սոչիում Պուտինի և Էրդողանի հանդիպման արդյունքներով կողմերը հուշագիր են ստորագրել, որի կետերից մեկը հոկտեմբերի 23-ից սիրիական տարածքի համատեղ պարեկումն է: Թուրքիան արդեն հայտարարել է «Խաղաղության աղբյուր» ռազմական գործողության դադարեցման մասին, և Ռուսաստանի ռազմական ոստիկանությունը ժամանել է սիրիա-թուրքական սահման՝ քրդական զորքերի դուրսբերումը վերահսկելու համար: