Թուրքիայում գրեթե 150 ոստիկաններ ներկա պահին ազատվել են աշխատանքից, նրանց նկատմամբ անօրինական գաղտնալսումներ կատարելու կապակցությամբ հետաքննություն է սկսվել, հայտարարել է Թուրքիայի ներքին գործերի նախարար Էֆկան Ալան Թուրքիայի ոստիկանության 169-ամյակին նվիրված արարողությանը: Այս մասին է գրում RIA Novosti-ն:
Երկրի հավարում՝ Ադանա քաղաքում, ապրիլի 8-ին սկսված օպերացիայի շրջանակներում 8 ոստիկան է ձերբակալվել:
ՆԳ նախարարը նշել է, որ անօրինական գաղտնալսումների վերաբերյալ հետաքննությունը կատարվում է երկրի տարբեր շրջաններում: «Այժմ ավելի քան 180 դեպք է հետաքննվում»,- ավելացրել է նա:
Ապօրինի գաղտնալսումների հետ կապված սկանդալը ծագել է այս տարվա սկզբին, երբ թուրքական ԶԼՄ-ները տեղեկացրել են, որ ավելի քան յոթ հազար մարդ՝ ընդդիմադիր կուսակցությունների անդամներ, հասարակական գործիչներ և մտավորականներ, առանց դատարանի համապատասխան որոշման, երեք տարի շարունակ անընդհատ գաղտնալսվում են:
Սկանդալը նոր թափ է առել փետրվար ամսին, երբ համացանցում հայտնվել են երկրի վարչապետի և նրա որդու հեռախոսազրույցի ձայնագրությունները: Մունիցիպալ ընտրությունների նախօրեին համացանցում են հայտնվել կառավարական գաղտնի ռազմական խորհրդի ձայնագրությունները:
