Անցյալ շաբաթ կառավարության նիստում հաստատվեց «Դատաիրավական բարեփոխումների 2019-2023 թվականների ռազմավարությունը և դրանից բխող գործողությունների ծրագիրը»։
Այս ռազմավարության կիրարկման համար նախատեսվում է ծախսել մոտ 20 միլիարդ դրամ։ Որքանո՞վ այն դատական համակարգը կդարձնի ավելի արդար և հանրության համար ավելի վստահելի․ «Առաջին լրատվական»-ի հարցին «Իմ քայլը» խմբակցության պատգամավոր Վահագն Հովակիմյանը պատասխանեց․ «Նախ՝ կցանկանայի նշել, որ 20 միլիարդ դրամը միանշանակ չի ենթադրում, որ պետբյուջեից է այդ գումարը ծախսվելու։ Եվրամիությունն արդեն հայտարարել է, որ ֆինանսական տեսանկյունից կաջակցի Հայաստանի Հանրապետությանը․ եթե չեմ սխալվում՝ նախնական 12 միլիոն եվրոյի մասին է խոսքը գնում։ Այսինքն՝ նրանք բացի խորհրդատվական, փորձագիտական աջակցությունից, պատրաստվում են նաև ֆինանսական աջակցություն ցույց տալ։ Բացառված չէ, որ առաջիկայում, ըստ ծրագրի իրագործման, նրանք նաև այլ աջակցություններ ցուցաբերեն։
Ինչ վերաբերում է արդյունքներին։ Մինչև 2023 թվականը մենք գլոբալ փոփոխությունները դատաիրավական ոլորտում պետք է ավարտենք։ Այլ կերպ ասած՝ մենք պետք է ունենանք նոր որակի դատաիրավական համակարգ։ Դա վերաբերում է ինչպես դատարաններին, այնպես էլ հետաքննությանը, նախաքննությանը, այսինքն՝ ամբողջ համակարգին։ Այլընտրանք չկա, դա հրամայական է, որը պետք է լուծվի»։
Իսկ փաստաբան Կարապետ Բադալյանը պատասխանեց․ «Այստեղ խնդիրը շատ պարզ է։ Մենք պետք է ունենանք ժողովրդավարական, իրավական պետություն, որն առանց անկախ դատական համակարգի չի կարող լինել։ Մենք ունենք մեր նախկին փորձը, երբ դատական համակարգն ինքն իրեն հեղինակազրկել է, եղել է գործադիրի կցորդը, և հիմա պետք է այդ իներցիան ինչ-որ ձևով ընդհատվի և սկիզբ դրվի նոր էնպիսի դատարանի, որն իր գործունեությամբ իր հեղինակությունը կվաստակի և իրոք կդառնա ժողովրդավարական պետության հենասյունը։ Այս բոլոր փոփոխությունների նպատակը դա է»։
Մանրամասները՝ տեսանյութում։