Ֆրանսիան, ինչպես և Գերմանիան, կդադարեցնի զենքի արտահանումը Թուրքիա՝ Սիրիայում «Խաղաղության աղբյուր» ռազմական գործողության պատճառով, հաղորդում է Reuters-ը:
Եվրամիության արտգործնախարարները կհամաձայնեցնեն իրենց դիրքորոշումը Թուրքիայի վերաբերյալ հոկտեմբերի 14-ին Լյուքսեմբուրգում կայանալիք հանդիպման ժամանակ: Իսկ մինչ այդ Ֆրանսիան և Գերմանիան արդեն որոշել են դադարեցնել զենքի արտահանումը:
«Այս հարձակման ավարտի ակնկալիքով (Թուրքիայի ռազմական գործողությունը Սիրիայում), Ֆրանսիան որոշեց ժամանակավորապես դադարեցնել զենքի արտահանումը, որը Թուրքիան կարող էր օգտագործել գործողության ընթացքում», – ասվում է երկրի արտաքին գործերի նախարարության հայտարարության մեջ:
Ավելի վաղ, Թուրքիայի նախագահ Ռեջեփ Թայիփ Էրդողանը հայտարարել է «Խաղաղության աղբյուր» գործողության մեկնարկի մասին, որի նպատակը քուրդ զինյալների և ԻՊ խմբավորման ահաբեկիչների դեմ պայքարն է: Ըստ Թուրքիայի ղեկավարի, ռազմական գործողությունների նպատակը Թուրքիայի հարավային սահմանների մոտակայքում գտնվող ահաբեկիչների կողմից վերահսկվող գոտու ոչնչացումն է՝ Սիրիայում խաղաղություն հաստատելու նպատակով: