1news.az-ի փոխանցմամբ՝ «Ազերբայջան» թերթին տված հարցազրույցում Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովն անդրադարձ է կատարել ղարաբաղյան հակամարտության կարգավորմանը.
«ԵԱՀԿ Մինսկի խմբի կողմից առաջ քաշված ղարաբաղյան հակամարտության խաղաղ կարգավորմանն առնչվող սկզբունքները չի կարելի ներկայացնել որպես տվյալ հարցում Ադրբեջանի կամ Հայաստանի միանշանակ հաղթանակի ապահովում։
Այդ սկզբունքները չեն երաշխավորում կողմերից և ոչ մեկի լիակատար հաղթանակը։ Ամեն դեպքում, համանախագահների առաջարկը ենթադրում է փոխադարձ զիջումներ։ Ադրբեջանական կողմի զիջումը Լեռնային Ղարաբաղի միջանկյալ կարգավիճակի տրամադրումն է։ Նորմալ խաղաղ պայմաններում բնակեցումից տասնամյակներ անց կհստակեցվի Լեռնային Ղարաբաղի մշտական կարգավիճակը, իսկ մինչ այդ Ադրբեջանը պատրաստ է տրամադրել միջանկյալ կարգավիճակ»։
Հասանովը նաև նշել է, որ Նախարարների կաբինետի նստաշրջանում այս տարվա առաջին կիսամյակի սոցիալ-տնտեսական զարգացումների ամփոփման ժամանակ Ադրբեջանի նախագահ Իլհամ Ալիևը բացահայտել է 4 հիմնական սկզբունքից բաղկացած Մադրիդյան նորացված սկզբունքների մի շարք դետալներ.
«Բնականաբար, ոչ բոլոր թվարկված սկզբունքներն են ամբողջովին գոհացնում Ադրբեջանին։ Որպեսզի բացարձակապես ամեն ինչ գոհացնի Ադրբեջանին, մենք պետք է պատերազմ սկսենք, ետ վերցնենք մեր հողերը և Հայաստանին հարկադրենք կնքել մեզ ձեռնտու պայմաններով խաղաղության համաձայնագիր, ինչը, սակայն, այսօրվա պայմաններում անհնար է։ Դրա համար էլ մենք, ցուցաբերելով կառուցողական մոտեցում, պատրաստ ենք փոխզիջումների»։
