Սիրիայի հյուսիսում թուրքական բանակի ռազմական գործողությունը կարող է վտանգավոր հետևանքներ ունենալ Սիրիայի միասնության համար և բացասաբար ազդել արաբական այդ հանրապետությունում ահաբեկիչների դեմ պայքարի ընթացքի վրա: Այդ մասին, ինչպես տեղեկացնում է RIA Novosti-ն, Լիբանանի նախագահ Միշել Աունը հայտարարել է ՄԱԿ-ի գլխավոր քարտուղարի քաղաքական գործերով օգնական Ռոզ Մարի դե Կառլոյի հետ հոկտեմբերի 10-ին Բաաբդի պալատում կայացած հանդիպմանը:
«Նախագահ Աունը ՄԱԿ-ի խորհրդականի ուշադրությունը դարձրել է այն բանի վրա, որ սիրիա-թուրքական սահմանին տեղի ունեցող վերջին իրադարձությունները կարող են վտանգավոր հետևանքներ ունենալ Սիրիայում պատերազմի ընթացքի վրա, և Լիբանանը հետևում է իրադարձությունների զարգացմանը՝ հուսալով, որ ոտնձգություններ չեն լինի Սիրիայի միասնության և փախստականների հետ կապված իրողությունների դեմ»,-ասված է Լիբանանի նախագահի մամուլի ծառայության հայտարարության մեջ: