«Եթե չփոխվի կառավարության աշխատաոճը որևէ փոփոխության մասին խոսելն ավելորդ է»,- այսօր լրագրողների հետ հանդիպմանը նման տեսակետ հայտնեց «Ազգային անվտանգություն» կուսակցության նախագահ Գառնիկ Իսագուլյանը:
Նրա խոսքով` եթե նույն թիմից պետք է լինի վարչապետը, իսկ գործող անձնինք մնան նույնը, անհնար է պատկերացնել, որ լուրջ աշխատանքի ձևի փոփոխություն լինի, ժողովրդի սոցիալական վիճակն էլ լավանա: «Այս օրերին թվարկվող անձերից ոչ մեկն այնքան ինքնուրույն չէ, որ գա, ձեռքը խփի սեղանին ու ասի՝ բոլոր լիազորություններս կիրակաացնեմ, ու որևէ մեկն ինձ չի խանգարի»,- ասաց նա:
Իսագուլյանի դիտարկմամբ` եթե սա ձևականորեն արված քայլ չէ, ուրեմն ՀՀ նախագահը երկորդ տարբերակին պետք է գնա, «դա է` նստել բավականին լուրջ բանակցությունների սեղանի շուրջ ոչիշխանական չորս ուժերի հետ, խոստանալ, որ պատրաստ է վարչապետի պաշտոնում նշանակել այդ ուժերի միասնական թեկնածուին: Եթե նա այս քայլին գնա` նպաստում է, որ երկրում լարվածությունը թուլանա. Այսինքն՝ կգա մարդ, որն աշխատելու է ոչ թե թելադրանքով, այլ օրենքով սահմանված իր լիազորություններն է իրականացնելու»:
Հարցին, թե բացառո՞ւմ է, որ վարչապետի հրաժարականը կարող էր դրսից պարտադրված լինել, Իսագուլյանն ասաց. «Արտաքին գործոնը Հայաստանում մեծ դերակատարում ունենալ չի կարող, ամեն ինչ ներքաղաքական գործընթացներով է պայմանավորված, բայց արտաքին ճնշում` ինչ-որ մեկին հանել կամ նշանակել, ես բացառում եմ»:
Գառնիկ Իսագուլյանն անդրադարձավ նաև այն տեսակետներին, որ ԲՀԿ-ն և ՀՅԴ-ն կարող են վերադառնալ կոալիցիա, և ասաց. «ԲՀԿ-ն միշտ ասել է, որ նախագահի հրաժարականի հարց չի դնում, եթե նա կոալիցիայում հիմնական դերակատարողն ու ծրագիր ներկայացնողը չլինի, ապա չի գնա: Եթե պետք է վարկաբեկվի այդ կառավարությունը, նրանք էլ կվարկաբեկվեն կառավարության հետ միասին: Բացի դրանից՝ ԲՀԿ-ի վարկանիշն այնքան բարձր է, որ չի գնա մի քայլի, որ իր վարկանիշն անկում ապրի»:
«Առաջին լրատվական»-ի այն հարցին, թե արդյոք ԱԺ նախագահ Հովիկ Աբրահամյանը, իր դիտարկմամբ, ԲՀԿ-ի համար ընդունելի չի՞ լինի, կամ, առհասարակ, բոլոր վեց խմբակցությունների համար, ինչպես երեկ հայտարարել է ՀՀԿ խմբակցության ղեկավար Գալուստ Սահակյանը, Իսագուլյանը պատասխանեց. «Կարելի է ասել, որ Գալուստ Սահակյանն էլ բոլոր վեցի համար ընդունելի կլինի: Խոսքն ամենևին այդ մասին չէ. այո, կարող են համաձայնել, բայց ի՞նչ էական փոփոխություն պետք է բերի Հովիկ Աբրահամյանը: Այո, շատ գործունյա է, բայց նույն թիմից է: Նա՝ որպես Հայաստանի երկրորդ դեմք, կարող էր շատ բան անել, բայց պարզ երևում էր, որ նա բոլոր նախաձեռնություններին կողմ էր: Հիմա, ասենք, ինքն է վարչապետ, կարո՞ղ եք ասել՝ ինչն է փոխվելու: Կարո՞ղ է, ասենք, այնպիսի ծրագրեր ուներ, որ սպասում էր՝ վարչապետ դառնար, նոր իրագործեր:
Լուսանկարը` PAN Photo-ի
