Սիրիայի շուրջ զարգացումները նոր փուլ են մտնում: ԱՄՆ նախագահ Դոնալդ Թրամփը թվիթերյան գրառմամբ հայտարարել է Սիրիայից ամերիկյան զորքը դուրս բերելու մասին: Թուրքիան իր հերթին մտադիր է ռազմական նոր գործողություն սկսել Սիրիայի հյուսիս-արևելքում: Թեմայի շուրջ «Առաջին լրատվական»-ը զրուցել է թուրքագետ Հայկ Գաբրիելյանի և արաբագետ Սարգիս Գրիգորյանի հետ:
Սարգիս Գրիգորյանն ուշադրություն հրավիրեց այն հանգամանքի վրա, որ Սիրիայում ամերիկյան զինուժի քանակի նվազեցման ծրագրեր Թրամփը վաղուց ուներ: «Կարծում եմ՝ խոսքը չի վերաբերում ամերիկյան զորքերին առհասարակ դուրս բերելու մասին, նրանք, ըստ ամենայնի, կքաշվեն դեպի հարավ և հնարավոր ռազմական գործողությունների արեալում չեն լինի… Ամեն դեպքում, կարծում եմ, մեծ տեղաշարժեր այս պահին չեն լինի, քրդերը արդեն որոշ ստորաբաժանումներ դուրս էին բերել այս հատվածից՝ դիրքավորվելով մի քիչ հեռու: Ամեն դեպքում քրդերը սա դիտարկում են որպես դավաճանություն դաշնակցի կողմից, որը հայտարարել էր, որ այդտեղ թուրք զինվոր չի լինելու»:
Գաբրիելյանն իր հերթին նշեց, որ ներկա դրությամբ խնդիրը ստեղծվելիք անվտանգության գոտու չափի, խորության մեջ է: «Ըստ էության, Միացյալ Նահանգները կանաչ լույս է վառել Եփրատ գետից արևելք թուրքական ներխուժման համար… Եթե Թուրքիան ցամաքային ներխուժում սկսի, իսկ ավիահարվածներ արդեն իսկ սկսել է հասցնել, կարող ենք 2019թ. որակել որպես Սիրիայում Թուրքիայի հաջողության տարի»:
Ստեղծված իրավիճակին անդրադառնալով Հայաստանի դիտանկյունից՝ Գաբրիելյանը փաստեց, որ Թուրքիան թեև հայտարարում է Սիրիայի տարածքային ամբողջականությանը, բայց դա չի խանգարում, որ ահաբեկիչների դեմ պայքարի շղարշի ներքո ներխուժի սուվերեն պետության տարածք: «Հայաստանը պետք է հետևի, բնականաբար, շատ զգոն լինի, Թուրքիան ինչքան էլ ցանկանա այլ երկրների տարածք մտնել, գրավել, փորձում է քիչ թե շատ խելամիտ հիմնավորում գտնել և օգտագործում է ահաբեկիչների հարցը: Հայաստանի համար վտանգավոր եմ համարում շրջանառվող լուրերն այն մասին, որ քուրդ զինյալներ գալիս են մեր երկիր, բուժում ստանում… Այնպես որ, Հայաստանի համար կարող է գլխացավանք դառնալ նման լուրերի շրջանառությունը»:
Գրիգորյանը ևս կարծում է՝ եթե թուրքական զինուժ հայտնվի Սիրիայի այդ հատվածում, մի շարք խնդիրներ կարող են առաջանալ Հայաստանի համար: Մեր զրուցակիցը ուշադրություն հրավիրեց այն փաստի վրա, որ Ղամիշլիում ունենք հայ համայնք, հետևաբար ցանկացած թուրք զինվորի ներկայություն Ցեղասպանությունից մազապուրծ եղած տարածքներում, զգայուն հարց է տեղացի հայերի համար: «Կհիշեք հայկական գումարտակի մասին շրջանառվող տեղեկությունները, մասնավորապես, թուրքական լրատվամիջոցների կողմից, այս գումարտակը ստեղծվել և գործում է Սիրիայի այս հատվածում: Եթե լինեն բախումներ, իսկ հայկական գումարտակը գործում է քրդական ստորաբաժանումների կազմում, ապա որոշակի խնդիրներ կարող են առաջանալ: Այնպես որ պետք է զգոն լինել և համայնքի ներուժը օգտագործելով՝ կանխատեսելի դարձնել իրավիճակը մեզ համար»:
Առավել մանրամասն՝ տեսանյութում: