Քաղաքագետ Էդգար Վարդանյանը, մեզ հետ զրույցում անդրադառնալով այն հարցին, թե երկար դիմադրելուց հետո իշխանությունները այնուամենայնիվ ինչի՞ արդյունքում ձևավորեցին աշխատանքային խումբ, նշեց, որ այդ քայլով իշխանությունը իրականում ևս մեկ անգամ մերժեց արտահերթ ընտրությունների և սահմանադրական կարգի վերականգնման շուրջ բանակցություններ անցկացնելու պահանջը:
«Պարզաբանեմ: Կոնգրեսն ասում էր՝ բանակցություններ արտահերթ ընտրությունների և սահմանադրական կարգի հաստատման շուրջ` պատվիրակությունների մակարդակով: Եվ, որը նույնպես շատ կարևոր էր, Կոնգրեսը պնդում է, որ ինքը կբանակցի միայն գործադիր իշխանության հետ, այլ ոչ թե պառլամենտական կոալիցիայի հետ: Հիմա, ի՞նչ է ասում իշխանությունը իր այս առաջարկով: Ասում է՝ աշխատանքային խումբ, այլ ոչ թե պատվիրակություն, որի հետ պետք է քննարկվեն կարևորագույն հարցեր, բայց բնականաբար՝ ոչ արտահերթ ընտրությունների և սահմանադրական կարգի հաստատման խնդիրը, որովհետև դրանով իշխանությունը կխոստովաներ, որ երկրում սահմանադրական կարգ չկա: Ինչպես նաև բանակցությունների եզրը չի օգտագործվում, և դա պատահական չէ: Ուղղակի աշխատանքային խմբի հետ պետք է քննարկվի իրականցվել: Հիմա ի՞նչն է փոխվել: Լրիվ այլ ձևաչափ ներկայացվեց, արդեն ասացի՝ մերժվեց Կոնգրեսի առաջարկը: Բայց մի նորություն մտցվեց: Մինչ այդ ասվում էր, որ Կոնգրեսը թող տարբեր գերատեսչությունների դիմի: Հիմա, փաստորեն, 6 հոգանոց մեկ խումբ է ձևավորվում: Նորությունը սա է»,- պարզաբանեց Էդգար Վարդանյանը:
Իսկ իշխանությունն, ըստ նրա, այդ քայլին դիմում է նախևառաջ ժամանակ շահելու համար: «Ինչ առումով: Իշխանությունը Արևմուտքին, որը ըստ էության ոչ անմիջական կամ հեռակա միջնորդն է այդ ամբողջ գործընթացի, փորձում է ցույց տալ, որ ինքը գնում է զիջումների և ամենևին էլ կոշտ դիրքորոշում չունի: Մյուս կողմից՝ իշխանությանը ձեռնտու է այս իրավիճակը, որովհետև արդյունքում ինքը կոշտ հակադրություն չի ունենում հանրապետությունում: Այսինքն՝ իրավիճակը չի սրվում և իր համար ավելորդ գլխացավանք չի ստեղծվում: Անընդհատ այսպես երկարաձգելով գործընթաց՝ ինքը ստանում է իր համար դեռևս ցանկալի արդյունքը»,- ավելացրեց քաղաքագետը:
