Շվեյցարական Դելհելցլի այգում, որը գտնվում է Բեռնում, երեք ամսական արջի են սպանել: Այգու ղեկավարության տարածած հաղորդագրությունից պարզ է դարձել, որ այդ ծայրահեղ քայլի պատճառը այն է, որ արջուկի մայրը՝ Մաշան, դադարել է նրա վրա ուշադրություն դարձնել, իսկ հայրը՝ Միշան, իր ձագի հանդեպ ագրեսիվ վերաբերմունք է ցուցաբերել, գրում է ITAR-TASS-ը:
Այգու ղեկավար Կորնելիա Մանինիի խոսքերով՝ ձագին ծնողներից առանձնացնելը կարող էր նրան հոգեկան տառապանքներ պատճառել, սակայն, ագրեսիվ ծնողների հետ էլ նրան թողնել չէր կարելի:
Հավանաբար, արջերի այս զույգի ագրեսիվ վերաբերմունքը իրենց ձագերի նկատմամբ պայմանավորված է նրանով, որ նրանց մարդիկ են կերակրել, այդ պատճառով էլ արջերին անհայտ է, թե ինչպես են իրականում գործում ընտանիքները, բացի դրանից, այս զույգը միմյանց վրա շատ է կենտրոնացած: Մանինիի խոսքերով՝ այս զույգն այլևս ձագեր չի ունենա, քանի որ այգին կստերիլիզացնի արուին:
Նշենք, որ անցած չորեքշաբթի արու Միշան սպանել էր իր մյուս ձագին, որը նույնպես ծնվել էր այս տարվա հունվար ամսին:
