Ձկնարտադրությանը վերաբերող բոլոր միջոցառումները Հայաստանում իրականացվում են թաքուն կամ կիսատ-պռատ՝ անհասկանալի հայտարարությունների միջոցով. տնտեսվարողը չի տիրապետում իր նկատմամբ իրականացվող միջոցառումների էությանն ու բովանդակությանը, նրան չի բացատրվում, թե ինչ է պետք իրականացնել և ինչպես: Ապրիլի 7-ին լրագրողների հետ հանդիպմանն այս մասին նշեց «Հայ ձկնարտադրողների և ձկնարտահանողների միություն» ՀԿ նախագահ Արթուր Աթոյանը:
Նրա խոսքով՝ նման միջոցառումներից է նաև ձկնաբուծության լիցենզավորումը, ջրահեռացման համար պայմանագրային առասպելական չափերի հասնող վճարների նախատեսումը: «Մենք ձկնարտադրողների ութսուն տոկոսի կորուստ կունենանք, ձկնարտադրությամբ զբաղվելու համար պետք է որոշակի լիցենզավորման գործընթաց անցնել, ինչի արդյունքում էլ կլինի այդ նվազումը:
Լիցենզիայի մեջ մտնում է բարձր գին, ջրի խնայում, տեխնոլոգիական արտադրամիջոցներ, որոնք մեր հնարավորություններից վեր են: Առանց մեզ հետ քննարկելու, համաձայնեցնելու նման որոշում են կայացրել»,- ասաց նա:
Աթոյանի խոսքով՝ 234 -ից 77 ձկնարտադրող ընկերություն մինչև անցած սեպտեմբեր փակվել են, նրանց թվում կան և՛ կայացածներ, և՛ խոշորներ, և՛ փոքրեր, փակվել են՝ չդիմանալով արտադրական ծանր պայմաններին: Աթոյանի խոսքով՝ հսկողության և վերահսկողություն իրականացնող բոլոր կազմակերպությունները կարծես մրցավազքի մեջ են մտել իրար հետ, թե ով ավելի կոշտ և կամայական գործողություններով կարող է խոչընդոտել, խաթարել ձկնարտադրության տնտեսական գործունեությունը, իսկ որոշ դեպքերում նրանց գործողությունները բացահայտորեն շեղվում են ՀՀ օրենսդրությունից և արտահայտվում են անձնական կամայականությունների դրսևորմամբ:
Միավորման նախագահը նշում է՝ ձկնաբուծության լիցենզավորման գործընթացը սկսելուց առաջ անհրաժեշտ է հաշվի առնել մեր երկրի աշխարհաքաղաքական դիրքը, տնտեսական վիճակը, բնակլիմայական պայմանները, հարևան պետությունների վերաբերմունքը և այլ կարևոր հարցեր:
«Ես հավատ չունեմ Սևանի ծրագրի նկատմամբ, բայց քանի դեռ գործընթացը ծրագրային փուլում է, ես չեմ ուզում քննադատել: Ռիսկեր տեսնում եմ՝ Սևանի ձնաբուծության հետ կապված, տա Աստված, որ մենք սխալվենք, սակայն դա նաև Սևանին կվնասի, Սևանի արտադրությունը շատ թանկ գին կունենա: Փոխանակ մտածեն, թե Սևանում ոնց նվազեցնեն գինը, ավելացնում են»,- ասաց նա: Որպեսզի Սևանը չվնասվի, Աթոյանը նշում է, որ պետք է ավելի բարձր որակի կեր լինի, որը մնացորդներ չի թողնի, լճի համար խնդիրներ չի առաջացնի:
Լուսանկարը՝ Armenpress-ի
