2020 թվականի նախագահական մրցավազքին մասնակցող ԱՄՆ նախկին փոխնախագահ Ջոզեֆ Բայդենի շտաբում քննադատել են նրա նկատմամբ հետաքննություն սկսելու ուղղությամբ՝ երկրի գործող առաջնորդ Դոնալդ Թրամփի փորձերը:
Թրամփը «հուսահատ կառչում է դավադրության տեսություններից, որոնք արդեն պսակազերծվել են անկախ և վստահություն ներշնչող ԶԼՄ-ների կողմից»,- հոկտեմբերի 3-ին հայտարարել է Բայդենի շտաբի ներկայացուցիչ Քեյթ Բեդինգֆիլդը:
Նրա խոսքերով՝ գործող նախագահի աշխատակազմը «ազատ անկման մեջ է գտնվում», իսկ ինքը՝ Թրամփը, ազգային հեռուստատեսությամբ «հիստերիայի մեջ ցնցվում է»:
Դրանից մի քանի ժամ առաջ երկրի առաջնորդը, լրագրողների հետ զրույցում հայտարարել էր, որ կցանկանար Բայդենի նկատմամբ հետաքննություն տեսնել ուկրաինական, ինչպես նաև չինական իշխանությունների կողմից: