Շատ ծիծաղելի է, որ նախկին արդարադատության նախարարը և ընդհանրապես նախկին իշխանության ներկայացուցիչները խոսում են արդարադատությունից կամ ընդհանրապես ինստիտուտների փլուզման մասին: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Գայանե Աբրահամյանը՝ անդրադառնալով Քոչարյանի աջակիցների կողմից դատավոր Աննա Դանիբեկյանի նկատմամբ ոտնձգություն իրականացնելուն և դրանից հետո նախկին իշխանությունների կողմից այդ երիտասարդներին պաշտպանելուն:
«Իրենք, ըստ էության, ինստիտուտներ չէին ստեղծել, իսկ արդարադատության համակարգի մասին ընդհանրապես, կարող ենք չխոսել, որովհետև այն ժամանակ գործում էր հեռախոսային արդարադատությունը: Եվ սա մենք չենք ասել, այլ հենց իրենց Ազգային ժողովի կողմից ընտրված օմբուդսմենը, որի արտահերթ զեկույցը շատ լավ հիշում ենք: Այդ զեկույցում շատ հստակ ոչ միայն հեռախոսային, պատվերով արդարադատության մասին էր խոսվում, այլ համատարած կոռուպցիոն համակարգի մասին: Հետևաբար, այդ հայտարարությունները կարող են դիտարկել որպես անպարկեշտության վերջին դրսևորում»,-ընդգծեց պատգամավորը:
