ՀՀ նոր վարչապետը ստիպված կլինի բոլոր քայլերը համաձայնեցնել Մոսկվայի հետ: Այս մասին այսօր «Առաջին լրատվական»-ի հետ զրույցում ասաց Արևելյան գործընկերության քաղաքացիական հասարակության ֆորումի Հայաստանի ազգային համակարգող, Երևանի մամուլի ակումբի նախագահ Բորիս Նավասարդյանը՝ անդրադառնալով հարցին, թե ՀՀ նոր վարչապետի գործունեությունը որքանո՞վ պետք է համաձայնեցված լինի Բրյուսելի հետ և կաշխատի՞ նա Բրյուսելի հետ:
Մասնավորապես անդրադառնալով շրջանառվող տեսակետներին, որ Տիգրան Սարգսյանի հրաժարականի պատճառը օրերս նրա դիտարկումներն էին Բրյուսելում, թե Հայաստանը պատրաստ է նախաստորագրել Ասոցացման համաձայնագիրը՝ Բ. Նավասարդյանն ասաց, թե չի կարծում, որ Բրյուսելում օրերս նրա արած հայտարարությունը կարող էր հրաժարականի պատճառ հանդիսանալ, հիմնական պատճառը ներքաղաքական է:
Ըստ Նավասարդյանի՝ Սերժ Սարգսյանը պարզապես հասկանում է, որ իր քաղաքական դիրքերն ամրապնդելու համար ինքը ստիպված է գնալ այդ քայլին: «Բայց, բնականաբար, ինչ-որ տեղ Մոսկվայի մեր գործընկերների մոտ Տիգրան Սարգսյանից նստվածք մնացել էր՝ Տիգրան Սարգսյանն այն վարչապետն էր, ում օրոք շատ լավ էին զարգանում հարաբերությունները ԵՄ հետ, և որը դեռ մեկ տարի առաջ ասում էր, որ ՄՄ-ն Հայաստանի համար չէ: Սա կարող էր ազդել վերաբերմունքի ձևավորման վրա, բայց դա հիմնական պատճառ դժվար թե հանդիսանար»,- ասաց Բորիս Նավասարդյանը:
Նա նշեց, որ կցանկանար Հայաստանում այնպիսի վարչապետ, որը կկարողանար աշխատել Բրյուսելի հետ, բայց հաշվի առնելով ՀՀ իշխանությունների քաղաքականության ուղղվածությունը դժվար է պատկերացնել, որ ՀՀ-ն Բրյուսելի հետ արդյունավետ աշխատող վարչապետ կունենա: Ըստ նրա՝ նոր վարչապետը ստիպված կլինի, հաշվի առնելով մեր ընդհանուր քաղաքական կոնյունկտուրան, առաջին հերթին բոլոր քայլերը համաձայնեցնել Մոսկվայի հետ: «ԵՄ-ն և ԱՄՆ-ն վաղուց են ձեռք քաշել Հայաստանից այն առումով, որ այս փուլում Հայաստանի հետ չեն էլ սպասում սերտ համագործակցություն: Այնպիսի վերաբերմունք կա, որ ով էլ լինի Հայաստանի իշխանության կազմում՝ իր հնարավորությունների չափով կհամագործակցի, իսկ այդ առումով անձը նշանակություն չունի»,- ասաց Բորիս Նավասարդյանը:
