«Որքան էլ անակնկալ էր այս պահին Տիգրան Սարգսյանի հրաժարականը, այնուամենայնիվ՝ նա վաղուց պետք է հրաժարական տար, բայց հարց է՝ ո՞վ պետք է լինի հաջորդ վարչապետը. սա է վախենալու: Սերժ Սարգսյանը ո՞ւմ պետք է բերի, ո՞վ կհամաձայնի կիսամեռած երկրի տնտեսությունը ղեկավարել, ո՞ր նորմալ անձնավորությունը այդպիսի ռիսկի կդիմի»,- «Առաջին լրատվական»-ի հետ զրույցում նշեց ֆրանսահայ գործարար Վալերի-Աշխեն Գործունյանը:
Նրա դիտարկմամբ՝ վարչապետի հրաժարականի հարցում Պուտինի «մատը խառն է», քանի որ Պուտինի ազդեցությունը Հայաստանում հիմա շատ ավելի մեծ է. «Անշուշտ, Հայաստանը միշտ է լավ եղել Ռուսաստանի հետ, պարզապես վերջերս մեծ թափով ենք մտել իրենց ազդեցության տակ, և ես վստահ եմ, որ Պուտինը պետք է թելադրի ամեն ինչ, խրատի:
Հայաստանը վերջացել է. երանի ես սխալ լինեմ, բայց ես մտածում եմ, որ Պուտինը հիմա, դժբախտաբար, ավելի մեծ ազդեցություն պետք է ունենա Հայաստանի մնացորդների վրա: Մենք այլևս ազատ չենք: Ամեն օր լուրերով հետևում ենք, թե ինչ խայտառակ վիճակում ենք»,- ասաց նա:
Վալերի Գործունյանի խոսքով՝ կարևոր է, թե ով կլինի հաջորդ վարչապետը, քանի որ միշտ վատից վատն էլ կա: Մի քանի տարի առաջ խոսում էին Ռալֆ Յիրիկյանի մասին՝ որպես վարչապետի թեկնածուի, բայց ըստ նրա՝ Ռալֆ Յիրիկյանը Ռուսաստանի մարդը չէ, և եթե իրեն ընտրեն, մի քիչ զարմանալի կլինի:
«Ռոբերտ Քոչարյանի տարբերակն էլ ռեալ չեմ համարում, քանի որ նա չունի ժողովրդի աջակցությունը, չնայած երբեմն լսում եմ այնպիսի կարծիք, թե նրա ժամանակ տնտեսական վիճակը ավելի լավ էր. ես դրանում վստահ չեմ: Բայց ամեն ինչ Հայաստանում կարող է լինել. կարող են Քոչարյանին բերել ու ասել՝ ինչու ոչ: Հայաստանում ամեն ինչ հնարավոր է, հուսամ՝ նման բան չի լինի: Հուսամ, որ ավելի վատին չեն բերի: Ես նման բան չեմ կարծում, Ռոբերտ Քոչարյանի գալուն ժողովուրդը չի սպասում», -հավելեց ֆրանսահայ գործարարը:
