ՀԱԿ անդամ, Հայաստանի լիբերալ կուսակցության նախագահ Հովհաննես Հովհաննիսյանին «Առաջին լրատվականը» հարցրեց, թե իշխանություն-ընդդիմություն երկխոսության շրջանակներում հնարավո՞ր է, որ արտահերթ ընտրրությունների հարցը շարունակի մնալ օրակարգային հարց, բայց դրան զուգահեռ քննարկվեն նաև այլ խնդիրներ:
Հովհաննես Հովհաննիսյանը նկատեց, որ տեսնում է նման հնարավորություն, բայց այդ բոլորը հարցերը շատ կոնկրետ պետք է կապված լինեն արտահերթ ընտրությունների հետ. «Հասնել արտահերթ ընտրությունների, կազմակերպել արտահերթ ընտրություններ՝ այս ամենն իր մեջ պարունակում է լուրջ հարցերի մի փաթեթ, որի դեպքում իմաստ կա ընդհանրապես արտահերթ ընտրությունների գնալու: Այնպես որ, երկխոսությունը պիտի լինի արտահերթ ընտրությունների շուրջը և արտահերթ ընտրությունների առնչությամբ: Պիտի ասեմ՝ այնպես չէ, որ պայմանավորվեցինք արտահերթ ընտրությունների շուրջ, պետք է նաև պայմանավորվել այն խաղի կանոնների շուրջ, որոնց համաձայն՝ արտահերթ ընտրությունները պետք է լինեն ազատ և արդար, ժողովրդավարական և թափանցիկ: Արտահերթ ընտրությունները իրենց մեջ պարունակում են բազմաթիվ էլեմենտներ»:
Հայաստանի լիբերալ կուսակցության նախագահը հավելեց, որ խնդիրը Հայ ազգային կոնգրեսինը չէ. «Մենք այս իշխանություններին ասել ենք՝ լավ, դուք գողապետություն եք սարքել, բայց մենք առաջարկում ենք միասին այս երկիրը փրկել այս վիճակից արտահերթ ընտրությունների ճանապարհով: Իրենք կզգա՞ն պատասխանատվություն այս հարցերի նկատմամբ, պատասխանատվություն կզգա՞ն այս երկրի համար՝ կգնան երկխոսության ճանապարհով: Հակառակ դեպքում մենք էլի հասնենք արտահերթ ընտրությունների, բայց կհասնենք արդեն հասարակության ճնշմամբ: Այդ ժամանակ թող մեզ չմեղադրեն, թող իրենք իրենց մեղադրեն, և իշխանություններն էլ պատասխանատվություն կկրեն բոլոր պրոցեսների համար և անձամբ Սերժ Սարգսյանը՝ այդ հնարավոր պրոցեսների համար»:
