Իրանը չի ձգտում ստանալ միջուկային զենք, ուստի թույլատրում է իր ատոմային օբյեկտների դիտարկումը: Սեպտեմբերի 27-ին այդ մասին հայտարարել է Իրանի նախագահ Հասան Ռուհանին մամուլի ասուլիսում, որը նվիրված էր ՄԱԿ-ի Գլխավոր ասամբլեայի բարձր մակարդակի շաբաթվա ուղևորության արդյունքներին՝ տեղեկացնում է TASS-ը:
«Նա, ով ցանկանում է միջուկային զենք ստանալ, նվազեցնում է իր նկատմամբ դիտարկման հնարավորությունները: Իսկ մենք դա չենք անում»,- մեջբերում է Ռուհանիի խոսքը Իրանի կառավարության մամուլի ծառայությունը: Նա հավելել է, որ «միջուկային գործարքի շրջանակներում Թեհրանի կողմից պարտավորությունների կրճատման երրորդ փուլը կարևոր նշանակություն ունի, և այժմ իրանական կողմն օգտագործում է ավելի առաջավոր ցենտրիֆուգներ ուրանի հարստացման համար»: «Բայց մենք վճռականորեն ժխտում ենք այն մեղադրանքները, թե ձգտում ենք միջուկային զենք ստեղծել»,- ասել է Ռուհանին: