Բաքվում Ադրբեջանի նախագահ Իլհամ Ալիևի և Թուրքիայի վարչապետ Ռեջեփ Թայիփ Էրդողանի համատեղ մամլո ասուլիսի ժամանակ Էրդողանը հայտնել է, որ իրենք հնարավորություն են ունեցել քննարկելու Ադրբեջանի հետ երկկողմ կապերը և տարածաշրջանային հարցեր, այդ թվում՝ ղարաբաղյան: Այս մասին հայտնում է Trend գործակալությունը:
«Մենք կրկին քննարկել ենք այն: Մենք հետագայում էլ Լեռնային Ղարաբաղի հարցում կդրսևորենք այնպիսի վճռական դիրքորոշում, ինչպիսին դրսևորել ենք մինչ այժմ: Զիջումներն այստեղ չեն կարող քննարկման թեմա լինել»,- ասել է Էրդողանը:
Էրդողանը նշել է երկկողմ ամուր կապերը և համոզմունք հայտնել, որ 2018-ին, երբ իրենք հասնեն իրենց նպատակներին՝ կապված TANAP-ի հետ, այդ միջազգային նախագիծը մի քանի անգամ կուժեղացնի իրենց եղբայրությունը:
«Միասնությունն ու համերաշխությունը մեր միջև քաղաքական, ռազմական, մշակութային, տնտեսական և առևտրային ոլորտներում հիանալի օրինակ են, որը ցույց է տալիս մեր եղբայրության բարձր մակարդակը: Վստահ եմ, որ ապագայում մենք միասին կկատարենք շատ լուրջ ներդրումներ»,- ասել է Էրդողանը:
