Ուկրաինայի նախագահ Վլադիմիր Զելենսկին մեկնաբանել է տեղեկություններն այն մասին, որ ԱՄՆ նախագահ Դոնալդ Թրամփը կարող էր իր վրա ճնշում գործադրել հեռախոսազրույցի ընթացքում։
«Ինձ վրա ոչ ոք ճնշում գործադրել չի կարող, որովհետև ես անկախ երկրի նախագահ եմ։ Ինձ վրա կարող է ճնշում գործադրել միայն որդիս, որը վեց տարեկան է»,- ասել է նա լրագրողներին։
Հարցին, թե չի պատրաստվում արդյոք ինչ-որ բան խնդրել Թրամփից, Զելենսկին պատասխանել է, որ կարելի է խոսել աջակցության մասին, բայց «Ուկրաինան նոր, ուժեղ երկիր է, ոչ մեկից ոչինչ չի խնդրում և ինքը կարող է «ինչ-որ մեկին օգնել»։
Ավելի վաղ ԱՄՆ Ներկայացուցիչների պալատի խոսնակ Նենսի Փելոսին հայտարարել էր նախագահ Թրամփի հանդեպ իմփիչմենթ սկսելու մասին։ Այժմ խորհրդարանի ստորին պալատի վեց կոմիտեները պետք է սկսեն նախագահի գործողությունների հետաքննությունը։ Ըստ Փելոսիի՝ Թրամփը խախտել է Սահմանադրությունը։
Առիթը հետախուզության աշխատակցի բողոքն էր, որը ղեկավարությանը տեղեկացրել էր, որ արտասահմանյան ղեկավարներից մեկի հետ խոսակցությունում Թրամփն ինչ-որ «տագնապալի խոստում» է տվել։ Ավելի ուշ The Wall Street Journal-ը և այլ պարբերականներ տեղեկացրել էին, որ խոսքը Զելենսկու հետ Թրամփի զրույցի մասին է։ ԱՄՆ նախագահն իբր Զելենսկուց պահանջել է հետաքննություն սկսել Հանթեր Բայդենի՝ նախկին փոխնախագահ, 2020-ի նախագահական ընտրություններին մասնակցել պատրաստվող Ջո Բայդենի որդու դեմ։
