«Մեզ համար արտահերթ ընտրություններն ինքնանպատակ չեն, դրանք պետք է ունենան լուրջ իրավական, քաղաքական նախադրյալներ»,- այսօր հրավիրված մամուլի ասուլիսին ասաց ԱԺ ՀՀԿ կուսակցության անդամ Հովհաննես Սահակյանը և հավելեց. «Քաղաքականության մեջ ոչինչ չի բացառվում, բայց այսօր արտահերթ ընտրություններ անցկացնելու հիմք ես չեմ տեսնում»։
Անդրադառնալով այլ ընդդիմադիր ուժերի, մասնավորապես «Ժառանգության» հնարավոր մասնակցությանը իշխանություն-ընդդիմություն բանակցություններին՝ «Ժառանգություն» խմբակցության քարտուղար Կարինե Հակոբյանը հայտնեց, որ դա պետք է տեղի ունենա ԱԺ-ում, և անգամ արտախորհրդարանական ուժերը պետք է ունենան իրենց ազդեցությունը ԱԺ-ի որոշումների վրա, սակայն «Ժառանգությունը, ըստ բանախոսի, չի մասնակցի այդ բանակցությանը։
Հովհ. Սահակյանի խոսքով՝ այդ ուժերին ուղղված հրավերը մշտապես կա. «Սա դեկլարատիվ բնույթի ինչ-որ քաղաքական հայտարարություն չէ, մենք առողջ քննարկումների համար միշտ բաց ենք»։
Խոսելով ԼՂ խնդրի շուրջ ծավալված վերջին իրադարձություններից՝ ՀՀԿ ներկայացուցիչը փաստեց. «Եթե որակելու լինեմ, կարող եմ ասել, որ որևէ ոչ հայանպաստ լուծում ես չեմ սպասում, որովհետև բանակցության սեղանի շուրջ նստած են այնպիսի մարդիկ, ովքեր մեծ ավանդ ունեն Ղարաբաղի հերոսամարտի առաջին օրվանից մինչ օրս, և այն դիրքորոշումը, որ մենք չենք գնում զիջումների, ապացույցն է, որ մենք չենք թույլ տալու որևէ ոչ հայանպաստ լուծում»։
«Ժառանգության» քարտուղարի խոսքով՝ ԼՂ գործընթացը վտանգավոր է, քանի որ, ըստ բանախոսի, եթե հայկական կողմը ինքը չի նախաձեռնողը, բանակցային կողմ լինել չի կարող. «Ոչ թե Արցախը այսօր բանակցային կողմ չէ, այլ Հայաստանը փաստացիորեն բանակցային կողմ չէ, ինչը շատ վտանգավոր է։ Երբ մենք գնալով կորցնում ենք մեր լիազորությունները, երբ թուլանում ենք, թուլանում ենք նաև այդ ցուցանիշով»,- և հավելեց. «Ժառանգությունը» իշխանությանը դեմ չէ, մենք ուզում ենք ունենալ ուժեղ իշխանություն»։
