Թուրքիայի վարչապետ Ռեջեփ Թայիփ Էրդողանը ՏԻՄ ընտրությունների արդյունքները բնորոշել է որպես իշխող «Արդարություն և զարգացում» կուսակցությանը (ԱԶԿ) վստահության քվեի արտահայտություն: Այս մասին նա հայտարարել է Ադրբեջան գնալուց առաջ, ուր մեկնել է աշխատանքային այցով, հայտնում է ITAR-TASS-ը:
«Մարտի 30-ին ընտրություններում Թուրքիան նախընտրեց կայունություն և հանգստություն, վստահության քվե տվեց: Չնայած դրանք տեղական ինքնակառավարման մարմինների ընտրություններ էին՝ մեր ժողովուրդը մեծ մասնակցություն ցուցաբերեց և պաշտպանել է մեր կուսակցության թեկնածուներին»:
Ժողովուրդը մեր կուսակցությանը ռեկորդային աջակցություն է ցուցաբերել»,- ասել է վարչապետը: Նա նաև ուշադրություն է հրավիրել, որ ընտրություններին ժողովուրդն աջակցել է նաև ԱԶԿ-ի «արտաքին քաղաքական գիծը»:
«Հաղթել է ոչ միայն մեր կուսակցությունը, այլև ամբողջ տարածաշրջանը, հաղթել է խաղաղությունը: Թուրքիան շարունակում է պաշտպանել ժողովրդավարությունն ու օրինականությունն ինչպես երկրում, այնպես էլ նրա սահմաններից դուրս»,- նշել է վարչապետը:
Մարտի 30-ին Թուրքիայում տեղի ունեցած ՏԻՄ ընտրությունների արդյունքներով՝ իշխող «Արդարություն և զարգացում» կուսակցությունը հաղթել է 45.6 տոկոս ձայներով:
