Ադրբեջանական Salam News գործակալության փոխանցմամբ՝ Բուլղարիայում գտնվող Թուրքիայի նախագահ Աբդուլլահ Գյուլը հանդիպում է ունեցել Բուլղարիայի գլխավոր մուֆթի Ալիշ Գաջիի հետ։ Հանդիպման ժամանակ կողմերը քննարկել են Բուլղարիայում բնակվող մուսուլմանների խնդիրները, բուլղարական դպրոցներում կրոնական կրթության խնդիրները։
Մուֆթին Գյուլին իրազեկել է մուսուլմանների ու թուրքերի հանդեպ ազգայնականների ու ռասիստների իրականացրած սադրանքների, ինչպես նաև երկրի մզկիթները վնասելու բազմապիսի փորձերի մասին։
Գյուլն իր հերթին նշել է, որ մուսուլմանների վրա իրականացված հարձակումներից տեղյակ է ոչ միայն Թուրքիան, այլև համայն աշխարհը. «Մենք խաղաղ կյանք ենք ցանկանում երկրի բոլոր քաղաքացիների համար՝ ներառյալ մուսուլմանները։ Հուսով եմ, որ բոլոր խնդիրները լուծվելու են օրենքի շրջանակներում ու կարճ ժամանակում»։
Հիշեցնենք, որ այս տարվա մայիսի վերջին ազգայնական ուղղվածություն ունեցող բուլղարական ATAKA կուսակցության ներկայացուցիչները ուրբաթօրյա նամազի ժամանակ ձվերով ու փայտերով հարձակում էին գործել նամազ անող թուրքերի վրա:
Ի դեպ, Բուլղարիայում բնակվում է 750,000 թուրք: