Դալմայի այգիների նախկին հողօգտագործողներն արդեն 11 տարի է՝ պայքարում են և, ինչպես իրենք են ասում, պայքարելու են մինչև խնդրի վերջնական լուծումը:
«Դալմա-Սոնա» հիմնադրամի նախագահ Ռուզաննա Ղազարյանը «Առաջին լրատվական»-ի հետ զրույցում ասաց, որ մեկ շաբաթ առաջ նամակ են ուղարկել ԱԺ նախագահին, ՀՀ նախագահին և ՀՀ վարչապետին, որտեղ առաջին հարցը, որ ուղղել են, հետևյալն է՝ ՄԱԿ-ը հանձնարարել է Հայաստանին՝ զբաղվել մեր խախտված իրավունքներով, իսկ ո՞վ է Հայաստանը:
Նա նշեց, որ ՄԱԿ-ի եվրոպական տնտեսական հարցերով հանձնաժողովը դեռ 2004-ին Դալմայի այգիների հարցին անդրադարձել էր՝ մասնավորապես նշելով, որ հանրությանը մասնակից չեն դարձրել կառուցապատման որոշումը կայացնելուց առաջ, և արդեն 10 տարի է՝ հանձնաժողովը անընդհատ այդ հարցը դնում էր քննարկման, և այն Հայաստանը մինչ օրս չի կատարել:
«Ինչպես հանրությունը պետք է մասնակցի որոշումների կայացման գործընթացին. այս հարցը մինչև հիմա չի կատարվել: Ուղիղ մեկ շաբաթ առաջ ենք գրել նամակ և դեռ պատասխան չունենք»,- հավելեց Ռուզաննա Ղազարյանը:
