Լուրեր
Իշխանությունը ուշացել է. շանսերը, որ Հրայր Թովմասյանը կզրկվի լիազորություններից՝ քիչ է

Երևանի ընդհանուր իրավասության դատարանն այսօր մերժեց Մարտի 1-ի գործով առանցքային մեղադրյալ Ռոբերտ Քոչարյանի խափանման միջոցը անհապաղ վերացնելու միջնորդությունը, որը ներկայացրել էին՝ հղում անելով Սահմանադրական դատարանի հայտնի որոշմանը: Նախկին նախագահը կշարունակի մնալ անազատության մեջ, իհարկե, իրավունք ունենալով 17-օրյա ժամկետում բողոքարկել այդ որոշումը:

Հայաստանը բուռն քննարկում է նաև ԱԱԾ տնօրեն Արթուր Վանեցյանի պաշտոնանկությունը՝ խոսելով դրա հնարավոր շարժառիթների, նաև ներքաղաքական հնարավոր ազդեցությունների մասին՝ զուգահեռ դիտարկելով, թե ով կարող է լինել ԱԱԾ նոր ղեկավարը:

Թեմայի շուրջ «Առաջին լրատվական»-ի հետ քննարկմանը մասնակցեցին իրավապաշտպան Իզաբելլա Սարգսյանը, ԱԺ «Իմ քայլը» խմբակցության պատգամավոր Վիկտոր Ենգիբարյանը և վերլուծաբան Դավիթ Հովհաննիսյանը:

Կարո՞ղ ենք ասել, որ Հայաստանի ներքին կյանքը, միգուցե նաև քաղաքական կյանքը նոր փուլ է մտնում. ի պատասխան այս հարցի՝ Իզաբելլա Սարգսյանը նշեց. «Կարծում եմ՝ նոր փուլը շարունակվում է: Շատ կարևոր էր ոչ միայն դատարանի այօրվա որոշումը, որն օրինաչափ էր, այլ նաև «Իմ քայլը» խմբակցության հայտարարությունը ՍԴ խնդիրը վերջապես հանգուցալուծելու վերաբերյալ: Զուգահեռաբար տեղի են ունենում այլ կարևոր գործընթացներ ևս, որոնցից է ստրատեգիական փաստաթղթերի քննարկումը՝ մասնավորապես դատական համակարգի ռեֆորմների հայեցակարգը, հակակոռուպցիոն ռազմավարությունը և այլն, այսինքն՝ կատարվում են կարևոր քայլեր հեղափոխությունը շարունակելու համար»:

Արդյո՞ք դատարանի այսօրվա որոշումից հետո կարելի է ենթադրել, որ Մարտի 1-ի գործի կասեցման վտանգն այլևս չեզոքացված է: Դավիթ Հովհաննիսյանի խոսքով՝ մեր աչքի առաջ կռիվ է գնում անկախ դատական համակարգի կայացման համար, և այդ ընթացքում անցնում ենք բազմաթիվ փուլերով. «Դատական համակարգի վրա իշխանության կողմից ճնշումներ չկան, բայց համակարգը բազմաթիվ թելերով կապված է նախկին ռեժիմի հետ, մինչև բարեվարքության գործընթաց չսկսվի դատական համակարգում և մինչև պատասխանատվության չենթարկվեն այն դատավորները, որոնք նախկինում գործիք են հանդիսացել քաղաքական հետապնդումներ իրականացնելու համար, չենք կարող ասել, որ դատական համակարգը լիովին ազատված է նախկին ռեժիմի ազդեցությունից, հետևաբար դեռ վաղ է խոսել այն մասին, որ բոլոր վտանգները չեզոքացված են»:

Վիկտոր Ենգիբարյանի գնահատմամբ՝ ՍԴ-ն ակնհայտորեն ապազգային և իրավունքի հետ կապ չունեցող գործողություններ է իրականացնում. «Մենք հույս ունենք, որ մեր փաստարկները բավարար կլինեն, որպեսզի ՍԴ դատավոր Հրայր Թովմասյանի լիազորությունները դադարեցվեն»:

Մանրամասն՝ տեսանյութում:

  • Դիտումներ՝ *