«Ամուսինս Հիտլերի պատերազմի մասնակից էր, առաջին կարգի հաշմանդամ, տղաս՝ Ղարաբաղյան պատերազմի մասնակից: Վարչապետին դիմում եմ՝ էս հաշմանդամ մարդի փողը մնացել է բանկում, հիմա մահացել է, քար ենք դրել, բայց քարի գումարը չկա, պարտքով ենք արել, էն վախտվա փողը՝ 15000 ռուբլի»,- Նոր Նորքի 8-րդ զանգվածի բնակչուհի Սեդա Հովհաննիսյանը այսօր կառավարության շենքի մոտ ամուսնու քարի գումարն էլ պահանջում վարչապետից:
82-ամյա «աշխատանքային հերոս» կինը պատմեց, որ յոթ տարեկանից որբ է եղել, յոթ երեխաներով մենակ են մեծացել, մեկ ձու անգամ չեն ունեցել ուտելու. «Մեկ ձուն էլ գալիս էր, Ստալինը տանում էր… Ես գյուղում էի ապրում: Որբ ապրել եմ, բա 82 տարեկանում պարտքո՞վ մեռնեմ»,- ասաց նա՝ հավելելով, որդին 40 տարեկան է, պատերազմի տարիներին վիրավորվել է, հազար փորձանքի միջով անցել, սակայն այսօր ի վիճակի չէ աշխատել:
Սեդա Հովհաննիսյանը խնամքով հանեց բոլոր փաստաթղթերը. «Որդիս 92-ին պատերազմի ժամանակ բոմբի տակ է մնացել, տարել են լցրել պադվալները, մի կին իրեն ու ևս երկու տղու փրկել է, բայց ձեռքը տղայիս վնասվել է, Ղարաբաղի կինոյի մեջ իմ տղի նկարը կա, իմ տղան գլխից ու ձեռքից վիրավոր է»,- ասաց 82-ամյա տատիկը:
