Վարչապետ Նիկոլ Փաշինյանը ԱԱԾ տնօրեն Արթուր Վանեցյանին աշխատանքից ազատելու միջնորդագիր է ստորագրել։
Ինչպիսի՞ն են ձեր մեկնաբանություններն ու դիտարկումներն այս հայտարարության շուրջ․ «Առաջին լրատվական»-ի հարցին Միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանը պատասխանեց․ «Եթե հիշում եք՝ օրեր առաջ մամուլում շրջանառվեց Վանեցյանի հնարավոր ազատման մասին լուրը։ Իհարկե, դա երբեք բավարար չի եղել լուրջ ընդունելու և քննարկելու, բայց եկեք մեկ տարի հետ գնանք։ Խոսքը վերաբերում է ԱԱԾ պետի և ՀՔԾ պետի զրույցի գաղտնալսմանը։ Դեռևս այն ժամանակ էին հնչում տեսակետներ, որ ԱԱԾ պետը պետք է թողնի պաշտոնը, որովհետև դա ազգային անվտանգությանն ուղղված հարված էր։ Ես նույնիսկ չեմ էլ ուզում կենտրոնանալ ներքին դիսկուրսների վրա, որովհետև դրա փոխարեն այլ բան կարող էր քննարկվել։ Հարցը դա չէր։ Հարցն այն էր, որ, ըստ էության, ինչ-որ ուժեր երկրի ներսում կամ երկրից դուրս կարող են գաղտնալսել ԱԱԾ ղեկավարին։ Մենք չունենք տեղեկություն՝ միայն ա՞յդ խոսակցությունն է գաղտնալսվել, թե՞ չէ։ Եվ, ըստ էության, գաղտնալսման հետ կապված առ այսօր որևէ հոդաբաշխ բացատրություն չի տրվել ԱԱԾ պետի կողմից։ Ընդհանրապես, կան մի քանի խնդիրներ, որոնց հետ կապված մենք դեռևս չունենք բացատրություններ։ Եթե հիշում եք՝ ԱԱԾ արխիվի անհայտանալու հարցը, որի ժամանակ ծառայողական հետաքննություն նշանակվեց, այն դեպքում, երբ դա, ըստ էության, քրեական գործ էր։ Եվ այդպես շարունակ»։
Իսկ վերլուծաբան Աղասի Մարգարյանն ասաց․ «Իոսիֆ Բրոդսկին ասում էր՝ եթե Եվտուշենկոն դեմ է կոլխոզներին, ապա ես կողմ եմ։ Եթե այդ պրիզմայով նայենք, և համացանցում նայենք, թե ովքեր են աղիողորմ լացուկոծ դրել, խորապես տխրել Վանեցյանի ազատումից, սակայն ինչպես վարչապետը նշեց իր մամուլի ասուլիսի ընթացքում՝ ԱԱԾ գործունեությունը և նրա պետի գործունեությունն այն ոլորտները չեն, որ մանրամասն և հրապարակային պետք է քննարկել։ Ամեն ինչ պետք է քննարկել լայն քաղաքական համատեքստում։ Ի վերջո պետք է գիտակցել՝ ուժային կառույցները մնում են ուժային կառույցներ, բայց այսօրվա ընդունված օրինագծով դրանք կարող են ղեկավարել քաղաքական գործիչներ»։
Մանրամասները՝ տեսանյութում։
