Հնդկաստանի բնակչուհի Էրամատի Մանգայաման դարձել է աշխարհի ամենատարեց մայրը՝ սահմանելով բացարձակ ռեկորդ: Սեպտեմբերի 5-ին, 74 տարեկան հասակում, նա երկվորյակներ է ծննդաբերել: Աղջիկները լույս աշխարհ են եկել արտամարմնային բեղմնավորման միջոցով:
Հնդկուհին և նրա 80-ամյա ամուսինը՝ Ռաջա Ռաոն, որոնք 57 տարի ապարդյուն փորձում էին երեխա ունենալ, հասցրել են զրուցել մամուլի հետ՝ հայտարարելով, որ «իրենց Երկրի ամենաերջանիկ զույգն են զգում»: Իսկ լրագրողների այն հարցին, թե ինչ կլինի, եթե ինչ-որ բան պատահի իրեն և իր կնոջը, ֆերմերը պատասխանել է, որ «ամեն ինչ Աստծո ձեռքերում է» և «կլինի այն, ինչ կլինի»:
Դուստրերի ծնվելու հաջորդ օրը Ռաոն տեղափոխվել է հիվանդանոց՝ վերակենդանացման բաժանմունք: Ըստ որոշ տեղեկությունների, նա ինսուլտ է ստացել կամ սրտի կաթված:
Այժմ հայտնի է դարձել, որ ամուսնուց հետո Էրամատին էլ է հայտնվել վերակենդանացման բաժանմունքում: Ըստ Daily Mail-ի, տարեց կնոջ մոտ սրտի կաթված է ախտորոշվել: Ինչպես պարզվել է, նա վերակենդանացման բաժանմունքում է ավելի քան մեկ շաբաթ:
Բժիշկները դեռևս որևէ կանխատեսում չեն արել ամուսինների վերաբերյալ:
