Ազգային ժողովի Սոցիալական հարցերի մշտական հանձնաժողովի նախագահ Հակոբ Հակոբյանը Սահմանադրական դատարանի այսօրվա որոշումը համարեց պետության հաղթանակը: ՍԴ-ն այսօր, ըստ էության, հակասահմանադրական ճանաչեց «Կուտակային կենսաթոշակների մասին» օրենքի «պարտադիր» բաղադրիչը: ՍԴ-ն նաև իշխանություններին մինչև սեպտեմբերի 30-ը ժամանակ տվեց՝ հակասահմանադրական դրույթները համապատասխանեցնելու Սահմանադրությանը:
Հ. Հակոբյանը ՍԴ-ում ներկայացնում էր իշխանական՝ պատասխանող կողմը: «Առաջին լրատվական»-ի հետ զրույցում նա հայտնեց, որ, այնուամենայնիվ, իշխանություններն իրենց նպատակին պետք է հասնեն, որովհետև դա արվում է քաղաքացիներին բարձր կենսաթոշակով ապահովելու համար:
– Պարոն Հակոբյան, փաստորեն Սահմանադրական դատարանը հակասահմանադրական ճանաչեց պարտադիր բաղադրիչը: Դա Ձեզ համար անակնկա՞լ էր:
– Այդպես չի կարելի ձևակերպել: Ես ճիշտ ձևակերպեմ՝ «Կուտակային կենսաթոշակների մասին» օրենքում «պարտադիր» բաղադրիչին վերաբերող մի շարք հոդվածներ ճանաչվեցին ՀՀ Սահմանադրությանը հակասող:
– Բայց դա գրեթե նույնն է, թե «պարտադիր» բաղադրիչն է հակասահմանադրական ճանաչվել:
– Ես իրավաբանորեն ձևակերպեցի, քանի որ մենք պարտադիր կուտակային բաղադրիչի մասին չունենք օրենք, մենք ունենք «Կուտակային կենսաթոշակների մասին» օրենք, որի մի մասը պարտադիր բաղադրիչն է: Եվ պարտադիր բաղադրիչին վերաբերող մի շարք հոդվածներ ճանաչվեցին Սահմանադրությանը հակասող:
– Եվ հակասահմանադրական այդ դրույթները պետք է մինչև սեպտեմբերի 30-ը համապատասխանեցվե՞ն Սահմանադրությանը:
– ՍԴ-ի որոշումն իմ ձեռքում չկա, բայց իմ լսածն ասում է հետևյալը, որ ՍԴ-ն օրենքում փոփոխություն կատարելու ժամանակ տվեց, որպեսզի այդ դրույթները չլինեն Սահմանադրությանը հակասող:
– Իսկ դա նշանակո՞ւմ է, որ կառավարությունը կհրաժարվի «պարտադիր» բաղադրիչից:
– Ես չեմ կարող պատասխանել այդ հարցին, որովհետև ՍԴ-ի որոշումը դեռ չեմ կարդացել: Մենք 2 օր հետո նոր կստանանք որոշումը:
– Այս պայքարում, փաստորեն, Ձեր ընդդիմախոսները հաղթանակ տարան, և ինչպես իրենք են մեկնաբանում՝ ՍԴ-ի այս որոշմամբ օրենքն ամբողջությամբ տապալվեց:
– Ես էլ եմ դա համարում հաղթանակ: Մեր երկրում քննարկվեց Ազգային ժողովի կողմից ընդունված և արդեն գործողության մեջ դրված օրենքը, որը ՍԴ-ի կողմից ճանաչվեց հակասահմանադրական: Մենք այդպիսի դեպքեր քիչ ենք ունեցել: Ընդ որում՝ շատ քիչ ենք ունեցել:
– Ո՞ւմ հաղթանակն եք համարում, ընդդիմությա՞ն հաղթանակը:
– Ես դա համարում եմ պետականության հաղթանակը, ժողովրդի և պետության հաղթանակը:
– Իսկ իշխանությունների՞:
– Դե, իշխանությունները պետության մի մասն են և նույն ժողովրդի հետ են: Իշխանությունների և պետության նպատակն ընդամենը մեկն էր՝ ապահովել բարձր, արժանապատիվ կենսաթոշակ: Եվ եթե դա արվում է հակասահմանադրական ճանապարհով, ուրեմն սխալ է: Այդ նույն պետությունը որոշեց, որ եթե կան Սահմանադրությանը հակասող դրույթներ, ուրեմն սխալ է:
– Այդ դեպքում իշխանությունները կհրաժարվե՞ն այդ համակարգից:
– Նման հարցի չեմ կարող պատասխանել, որովհետև այդ համակարգում ընդամենը մեկ օղակ եմ: Դա պետք է լինի քաղաքական բանաձև: Ավելացնեմ, որ իշխանություններն իրենց նպատակին պետք է հասնեն, որովհետև սա արվում է քաղաքացիներին բարձր կենսաթոշակով ապահովելու համար:
– Իսկ այդ նպատակին հասնելու համար կհրաժարվե՞ն այդ ճանապարհից:
– Նպատակն ու համակարգը տարբեր են: Եթե այս համակարգը լավը չէ կամ ճիշտ չէ, կամ հակասահմանադրական է, ապա պետք է գտնել նպատակն իրականացնելու այլ ճանապարհ:
– Իսկ ինչպե՞ս եք գնահատում ՍԴ-ի այսօրվա որոշումը:
– Գնահատում եմ շատ պարզ և հասկանալի: Այս դեպքը ցույց տվեց, որ մեր պետությունը և հանրությունն իրար հետ կարողանում են բանակցել և ընդունել սահմանադրորեն ճիշտ որոշում:
– Պետություն ասելով ո՞ւմ նկատի ունեք:
– Պետություն ասելով նկատի ունեմ Ազգային ժողովին, կառավարությանը և այլ կառույցների: Պետություն ասելով ո՞ւմ են նկատի ունենում՝ պետական բոլոր մարմիններին:
– Այդ դեպքում ՍԴ-ի որոշման հետ ի՞նչ կապ ունեին Ձեր թվարկած մարմինները:
– ՍԴ-ի որոշմամբ հակասահմանադրական ճանաչված օրենքի այդ դրույթները մշակվել են պետական այդ մարմինների կողմից:
Լուսանկարը` PAN Photo-ի