2001 թվականին Երևանի Առագաստ սրճարանի զուգարանում դաժանորեն սպանված Պողոս Պողոսյանի հարազատների դիմումն ու գործով վկա Սթիվեն Նյուտոնի վկայությունը այս պահին ուսումնասիրման փուլում են ։ Այդ մասին «Առաջին լրատվական»-ի հետ զրույցում ասացին ՀՀ գլխավոր դատախազությունից։
Հիշեցնենք, որ դեռ անցած տարի Պողոս Պողոսյանի գործը վերաբացելու համար նրա հարազատները դիմում էին ուղարկել Գլխավոր դատախազության և ՀՀ Ազգային անվտանգության ծառայության: Բացի դրանից՝ Հայաստան է վերադարձել նաև Պողոս Պողոսյանի սպանության ականատես Սթիվեն Նյուտոնը և արդեն իսկ մի քանի լրատվամիջոցի պատմել է, թե ինչի է ականատես եղել տարիներ առաջ։ Դատախազությունը ուսումնասիրում է նաև այդ վկայությունը։
Թե որքանով է գործի վերաբացում հնարավոր, դեռ հայտնի չէ։ Այդ հարցի պատասխանը պետք է տա դատախազությունը։
Սակայն ուշագրավ է, որ տարիներ առաջ Պողոս Պողոսյանի իրավահաջորդի ներկայացուցիչ փաստաբան Ռուբեն Սահակյանը, որը ներկայումս ներկայացնում է Ռոբերտ Քոչարյանի պաշտպանությունը, Պողոս Պողոսյանի գործի վերաբացումն աբսուրդ է համարել։
Քոչարյանին սպասարկող լրատվամիջոցներից մեկի հետ զրույցում ներկայանալով ոչ թե որպես Պողոս Պողոսյանի շահերի պաշտպան, այլ մեղադրյալ՝ Քոչարյանի անվտանգության ծառայության աշխատակից՝ Կուկու մականունով հայտնի Աղամալ Հարությունյանի շահերի պաշտպան, Սահակյանը հայտարարել է, որ Պողոս Պողոսյանի դեպքում դիտավորյալ սպանություն չի եղել, և Քոչարյանն էլ որևէ հրահանգ չի տվել։ Եվ որ բացառված է գործի վերաբացումը։ «Վերջերս մեկ հրապարակում կարդացի, որ իբրև կատարվել է դիտավորյալ սպանություն, եթե այդպես է, ուրեմն՝ վաղեմության ժամկետը որոշում է դատարանը։ Իսկ դրա համար անհրաժեշտ է, որպեսզի դատախազությունը վերաբացի այդ գործի վարույթը, ինչը բացառում եմ։ Չնայած, իրավական առումով բացառում եմ գործի վերաբացումը, բայց այսօրվա Հայաստանի պայմաններում, կարծում եմ՝ այն, ինչ տեղի է ունենում գործի հետ կապված՝ ուղղորդված գործընթաց է, այդ պատճառով էլ, ըստ իս, ամեն ինչ հնարավոր է»,- այդ լրատվամիջոցին ասել է Ռուբեն Սահակյանը և ավելացրել, որ սա Քոչարյանի հետ կապված որևէ ազդեցություն չի կարող ունենալ, քանի որ դրա համար անհրաժեշտ են ապացույցներ․ «Ո՛չ այս, ո՛չ Մարտի 1-ի գործով չկան ապացույցներ, որ տեղի է ունեցել դիտավորյալ սպանություն, և, որ այդ հանձնարարությունը տվել է հենց Ռոբերտ Քոչարյանը։ Նման բան գոյություն չունի, սա ներկայիս իշխանությունների հերթական սադրանքն է։ Համոզված եմ՝ տեղի է ունենում ուղղորդում, դե տեսնում են, որ Քոչարյանի գործը շատ թույլ է, այդ գործում մեղադրանք չկա։ Եթե այդ գործը տանք 5-րդ կուրսի իրավաբան ուսանողներին, կծիծաղեն, երբ այդ մեղադրանքը կարդում են, սատկած հավի ծիծաղն էլ է գալիս»։
Այսինքն՝ Ռուբեն Սահակյանը ոչ միայն չի ուղղում Քոչարյանին սպասարկող լրատվամիջոցի լրագրողին և ասում, որ ինքը ոչ թե Կուկուի փաստաբանն է եղել, այլ Պողոս Պողոսյանի շահերն է պաշտպանել դատարանում, այլև ակնհայտորեն խոսում է Կուկուի շահերից։ Ասում, որ սպանությունը դիտավորյալ չի եղել, Քոչարյանը հրահանգ չի տվել և այլն։
Մինչդեռ բոլորին է հայտնի, որ Պողոս Պողոսյանը Առագաստ սրճարանի զուգարանում սպանվել է հենց Քոչարյանի անվտանգության աշխատակիցների կողմից, նրա ցուցումով, այն բանի համար, որ մոտեցել է սրճարանում գտնվող Քոչարյանին և ողջունել՝ «պրիվետ, Ռոբ»։ Քոչարյանը, Պողոս Պողոսյանի սպանությունից հետո անդրադառնալով իրեն ուղղված մեղադրանքներին, ասել էր, որ ինքը կապ չունի, բայց որ Պողոսյանը մահացած չլիներ, ինքը դեռ շատ բան կունենար ասելու։
Պողոս Պողոսյանի եղբորորդին՝ Սամվել Պողոսյանն «Առաջին լրատվական»-ի հետ զրույցում ասաց, որ Ռուբեն Սահակյանի հայտարարությունները խոսում են այն մասին, որ նա մի փաստաբան է, որն իր գործը ժամանակին շատ վատ է արել, հիմա էլ փորձում է պաշտպանել մի մարդու, որի դեմ ժամանակին պետք է դատ հարուցեր, բայց կարողացել է Քոչարյանի շահերը պաշտպանել ու դատավարությունը տանել պրավալի։ «Ռուբեն Սահակյանը բացահայտ կեղծիքներով է զբաղված եղել։ Ռուբեն Սահակյանը ժամանակին միտումնավոր վկայի ցուցմունքը պատշաճ դատարան չներկայացրեց։ Այս ամենից հետո կասկած չի մնում, որ էդ մարդը ժամանակին ծախված է եղել։ Հիմա նա Քոչարյանի փաստաբանն է։ Եվ եթե հիշում ենք, ապա անմիջապես հենց այդ դեպքերից հետո մեր հարցը՝ Պողոս Պողոսյանի սպանության գործը, ծածկադմբոց անելուց հետո Ռուբեն Սահակյանը դարձավ Փաստաբանների պալատի նախագահ։
Ամեն ինչ հենց դրա մասին է խոսում»,- ասաց Սամվել Պողոսյանը։
Իսկ որ Ռուբեն Սահակյանն ակնհայտ շահագրգռվածություն է ունեցել այս գործով՝ հօգուտ Քոչարյանի և նրա անվտանգության աշխատակցի, մենք արդեն գրել ենք։ Գրել ենք, որ տարիներ առաջ գործով վկա Սթիվեն Նյուտոնի ցուցմունքը Ռուբեն Սահակյանը դատարանին է ներկայացրել ոչ պատշաճ կերպով, միայն թարգմանած օրինակը՝ առանց կնիքի, ստորագրության և նոտարական վավերացման, ինչի պատճառով էլ այն դատարանի կողմից չի ընդունվել։ Մինչդեռ, եթե Սթիվեն Նյուտոնի ցուցմունքը այդ ժամանակ դատարանին ներկայացվեր պատշաճ կերպով, ապա գործը կարող էր բոլորովին այլ ընթացք ստանալ։
