Այսօր՝ սեպտեմբերի 11-ին, Ազգային ժողովը շարունակում է աշխատանքները: Այժմ քննարկվում է ՀՀ-ի և Երուսաղեմի Սուրբ Հովհաննեսի, Հռոդոսի և Մալթայի ինքնիշխան մարտական բարեխնամ ուխտի միջև համագործակցության համաձայնագիրը վավերացնելու մասին հարցը:
«Այս համաձայնագրի վերաբերյալ խորհրդարանի իրավական փորձաքննություն վարչությունը տվել է եզրակացություն, որ այն համապատասխանում է մեր երկրի Սահմանադրությանը և օրենքների պահանջներին»,- հայտարարեց պատգամավոր Արման Բաբաջանյանը:
Նա նշեց, ոի իր համար հատկապես ուշագրավ էր հենց այս նախադասությունը, որովհետև մի քանի ամիս է՝ ՍԴ-ի շուրջ առկա է ճգնաժամ. «Մենք շարունակում ենք այս փաստը անկարևոր համարել այս և մի շարք այլ կարևոր համաձայնագրերի քննարկմանն անդրադառնալիս: Ես ուզում եմ, որ կանգ առնենք այս խնդրի վրա»:
Նրա խոսքով՝ ճգնաժամը հեղաշրջում է, անցումային վիճակ, ճեղք, իրավիճակ, որի դեպքում նպատակներին հասնելու համար գոյություն ունեցող բոլոր միջոցները դառնում են անբավարար, և որի արդյունքում առաջանում են անկանխատեսելի իրավիճակներ. «Ճգնաժամը ի հայտ է բերում թաքնված հակասություններ և անհամաչափություններ. ճգնաժամի փայլուն օրինակ է, օրինակ, հեղափոխությունը»:
Նա ընդգծեց, որ և՛ վարչապետը, և՛ ԲԴԽ-ն սահմանել են, որ ՍԴ-ի շուրջ իրավիճակը ճգնաժամային է. «ՍԴ անդամներից մեկը նամակով դիմել է Ազգային ժողովին. դուք բոլորդ տարակուսած այդպես էլ որևիցե բան չասացիք Վահե Գրիգորյանի նամակի կապակցությամբ: Դրանց հաջորդեցին այլ եզրակացություններ, և մինչև հիմա մենք չունենք գործողությունների պլան: Վիճակը բավական անորոշ է, որովհետև մենք մինչև հիմա շարունակում ենք քննարկել փաստաթղթեր, որոնք գնում են Սահմանադրական դատարան, փակ ռեժիմով քննարկվում են, ինչու փակ ռեժիմով՝ որովհետև երես չունեն ժողովրդին նայելու, և մենք շարունակում ենք այս մարդկանց վստահել այս կարևոր համաձայնագրերի քննարկումը, թե արդյոք այս համաձայնագրերը համապատասխանո՞ւմ են ՀՀ Սահմանադրությանը, թե՞ ոչ»:
Արման Բաբաջանյանը պատրաստակամություն հայտնեց այս հարցով իր լուծումներն առաջարկելու:
Մանրամասները՝ տեսանյութում: