Մեծ Բրիտանիայի խորհրդարանը սեպտեմբերի 9-ին պաշտոնապես աշխատանքը կդադարեցնի մինչև հոկտեմբերի 14-ը: Դա կլինի արդի պատմության մեջ ամենաերկար ընդմիջումը խորհրդարանի աշխատանքում, ինչի մասին հայտնել է Sky News հեռուստաալիքը՝ վկայակոչելով Դաունինգ-սթրիթի ներկայացուցչին:
Խորհրդարանն աշխատանքը կդադարեցնի աշխատանքային օրվա ավարտին: Դաունինգ-սթրիթում կոչ են արել քվեարկել արտահերթ ընտրությունների անցկացման օգտին, որպեսզի «հասարակայնությանը հնարավորություն տրվի որոշում ընդունել»:
Խորհրդարանի աշխատանքի դադարեցումը նախաձեռնել է բրիտանական կառավարության ղեկավար Բորիս Ջոնսոնը: Նրա մտահղացմամբ, օրենսդիրները չեն աշխատի սեպտեմբերի 9-ից մինչև հոկտեմբերի 14-ը, երբ պատգամավորների առջև պետք է ելույթ ունենա թագուհին, ով կհրապարակի կառավարության նոր գերակայությունները: Այդպիսով, խորհրդարանականները զգալիորեն քիչ օրեր կունենան Բրյուսելի հետ քննարկելու գործարքը՝ ԵՄ-ից Մեծ Բրիտանիայի դուրս գալուց առաջ, որը պլանավորված է հոկտեմբերի 31-ին:
Մինչդեռ Բրիտանիայի Համայնքների պալատի պատգամավորները չեն պաշտպանել հոկտեմբերի 15-ին վաղաժամկետ ընտրություններ անցկացնելու առաջարկը:
Ավելի վաղ Daily Telegraph թերթը՝ վկայակոչելով Բրիտանիայի կառավարության աղբյուրները, հայտնել է, որ Մեծ Բրիտանիայի վարչապետ Բորիս Ջոնսոնի կառավարությունը քննարկում է մի քանի պլաններ, որոնք պետք է իրեն թույլ տան օրինական ճանապարհով շրջանցել Brexit-ի հետաձգման մասին օրենքի գործողությունը:
Անցյալ շաբաթ Բրիտանիայի խորհրդարանն ընդունեց օրենք, որը կառավարությանը պարտավորեցնում է Եվրամիությունից խնդրել Brexit-ի ժամկետի նոր հետաձգում այն դեպքում, եթե մինչև հոկտեմբերի 19-ը Լոնդոնը և Բրյուսելն այդպես էլ համաձայնության չգան «ապահարզանի» պայմանների շուրջ: Սակայն, հրատարակության զրուցակիցների խոսքով՝ Ջոնսոնը, ով պնդում է, որ թագավորությունը պետք է ԵՄ-ն լքի հոկտեմբերի 31-ից ոչ ուշ, մտադիր է Եվրամիությանը համոզել չհամաձայնելու նոր հետաձգմանը: Պաշտոնական խնդրանքի հետ կառավարությունը կարող է Բրյուսել ուղարկել նամակ իր դիրքորոշման շարադրանքով, որը տարբերվում է խորհրդարանական մեծամասնության դիրքորոշումից, և ուղղակիորեն նշել, որ չի ցանկանում Եվրամիությունից դուրս գալու ժամկետը հետաձգել հոկտեմբերի 31-ից հունվարի 31-ը:
«Մենք մտադիր ենք թույլ չտալ ցանկացած հետաձգում: Պարտվողական օրենքը նշանակություն կունենա սոսկ այն դեպքում, եթե մեզ հետաձգում առաջարկվի, սակայն, երբ մեր պլանը հասկանալի դառնա, ապա շատ հավանական է, որ այդպիսի շարունակություն չի հետևի»,- հայտարարել է թերթի աղբյուրը, որի խոսքով՝ նախարարների կաբինետը նաև ունի պահեստային պլան այն դեպքում, եթե Բրյուսելը համաձայնի Brexit-ի հետաձգմանը։
