Իշխանափոխությունից հետո Ուկրաինայում ծավալվող իրադարձությունները վերջերս շատ են համեմատվում Հայաստանի քաղաքական գործընթացների հետ: Արդեն սկսել է աշխատել Ուկրաինայի Գերագույն հակակոռուպցիոն դատարանը, որ շուրջ 3500 քրեական գործ կստանա քննության համար:
Հայաստանում նոր է մշակվում դատաիրավական բարեփոխումների և հակակոռուպցիոն ոլորտի ռազմավարությունը:
2020 թվականի հունվարի 1-ից Ուկրաինայում չեղարկվում է նաև պատգամավորական անձեռնմխելիությունը: Ուկրաինան որոշել է մասնավորեցնել խոշոր պետական կորպորացիաները և գյուղատնտեսական նշանակության հողերը: Ուկրաինայի Ռադայում նաև օրենք է մտցվել պաշտոնյաների ապօրինի հարստացման մասին, որը նախատեսում է անօրինական կուտակած հարստության բռնագրավում: Հայաստանում նույնպես մտադիր են նման օրենք ընդունել:
Թեմայի շուրջ «Առաջին լրատվական»-ի հետ քննարկմանը մասնակցեցին «Մոդուս Վիվենդի» կենտրոնի ղեկավար Արա Պապյանը, Երևանի մամուլի ակումբի նախագահ Բորիս Նավասարդյանը և քաղաքագետ Սուրեն Պետրոսյանը: Քննարկման մասնակիցների կարծիքով՝ հեղափոխությունը ենթադրում էր արագ գործողություներ, մինչդեռ խորհրդարանի կողմից անհրաժեշտ քայլերն ուշանում են. «Հապաղում ենք»:
Անդրադառնալով վերոնշյալ զուգահեռներին՝ Բորիս Նավասարդյանը նկատեց, որ Ուկրաինայում բարեփոխումները շատ ավելի վաղ են սկսվել. «Հիշատակված բոլոր ինստիտուտները գոյություն ունեին թղթի վրա, նախապատրաստվում էին նրանց գործունեությանը, այլ բան է, որ կոռումպացված օլիգարխիան դիմադրում էր, հիմա եկել է ժամանակը, երբ նոր իշխանությունները փորձում են հաղթահարել այդ դիմադրությունը և աշխատեցնել այն, ինչ մշակված է: Մեզ մոտ նոր է սկսվում ծրագրերի մշակումը: Հեղափոխությունից հետո բավականին ժամանակ կորցրել ենք: Հիմա հապճեպ փաստաթղթեր են պատրաստվում, համոզված չեմ, որ այդ փաստաթղթերը կարող են հիմք ծառայել պրակտիկ գործողությունների համար»:
Արա Պապյանը շեշտեց այն հանգամանքը, որ մեզ մոտ է հեղափոխություն եղել, Ուկրաինայում կարծես թե հերթական ընտրություններ էին, հետևաբար մենք ավելի արագ և ավելի արմատական քայլերի պետք է գնայինք: «Այստեղ քաղաքական կամքի խնդիր կա: Կարծում եմ՝ մեր սխալն այն է, որ մենք փորձում ենք հեղափոխություն անել նախահեղափոխական օրենքների ու Սահմանադրության հիման վրա, աշխարհում նման նախադեպ չկա, որ հեղափոխություն լինի նախկինների գրած օրենքներով. հեղափոխությունը հենց նրա համար է, որ որոշ օրենքներ կասեցվեն և հեղափոխության ուժով որոշակի կարգեր մտցվեն»:
«Օրենքի ոտնահարմամբ ձեռք բերված սեփականությունը պետք է ազգայնացվի, ոչ թե օրենքի պաշտպանության տակ գտնվի»,- նշեց Ա. Պապյանը: Նա նաև ընդգծեց, որ քաղաքական գնահատական պետք է տրվի անցյալին:
Սուրեն Պետրոսյանի դիտարկմամբ՝ մեր երկիրը դեռևս գտնվում է խաչմերուկում, որտեղ հրաժարվել ենք անցյալից, բայց դեռևս չենք որդեգրել նորը. «Նոր ճանապարհի ընտրությունը ենթադրում է համակարգային մեծ փոփոխություններ»:
Մանրամասն՝ տեսանյութում: