«Ի տարբերություն նախկին իշխանափոխական իրավիճակների, որոնց ժամանակ իշխանություններն առանց ջղաձգվելու հեռացան, երրորդ իշխանափոխության ժամանակ, որը նաև հեղափոխություն էր, նախկին իշխանությունը շատ մեծ դիմադրություն է ցուցաբերում: Վերջին ամիսների պրոպագանդային հետևելով՝ ինձ թվում է, որ մեր երկրում քաղաքացիական պատերազմ է՝ առանց զենքերի: Հոգեբանորեն իրավիճակն այնքան սրված է, որ եթե հարկ լինի, դրանից էլ չեն խորշի»,- այս մասին «Առաջին լրատվական»-ի հետ զրույցում ասաց բանաստեղծ, թարգմանիչ, ՀՀ մշակույթի նախկին նախարար Հակոբ Մովսեսը:
Նրա դիտարկմամբ՝ Սերժ Սարգսյանի և Ռոբերտ Քոչարյանի իշխանության տարիներին փողը դարձել է իշխանական լծակ. «Մեր երկրում, ցավոք, հիմա երկիշխանություն է. մենք ունենք օրինական իշխանություն և փողի իշխանություն: Եվ ամենազարհուրելին այն է, որ նախկին օլիգարխիկ իշխանությունը այժմ պակաս իշխանական հզորություն չունի՝ և՛ պրոպագանդայի, և՛ ժողովրդի վրա ազդեցության տեսակետից: Սա, իհարկե, քաղաքացիական պատերազմի իրավիճակ է, որտեղ ատելություն է բորբոքվում. բանավեճը դադարում է, և սկսում են գործել կրքերը»:
«Հեռացված իշխանությունը մսուրում հավաքած ամեն ինչը տարել է, հիմա չի հանդուրժում իր հեռանալը և ուզում է անպայման վերադառնալ»,- նշեց մեր զրուցակիցը՝ հավելելով, որ իր կարծիքով՝ ՀՀԿ-ն չի կարող վերադառնալ, չունի դրա հնարավորությունը: «Բայց ավելի վատ հնարավորություն կա, նա կարող է կերպարանափոխված՝ ուրիշ անվամբ և ուրիշի դիմակի տակ վերադառնալ, և այդ դեպքում կունենանք ավելի վատ իրավիճակ»:
«Մենք հիմա ապրում ենք պաթոսի ժամանակաշրջանում. գործնական շատ մեծ բաներ չենք կարող անել, բայց կարող ենք բարոյական պաթոս որդեգրել, որը կարող է գործնական իրավիճակներ ծնել,- հույս հայտնեց բանաստեղծը:- Մեր երկրում շատ բան է փոխվել: Հոգեբանորեն փոխվել է հենց թեկուզ այն, որ յուրաքանչյուր քաղաքացի իրեն քաղաքական միավոր է զգում»:
Մանրամասն՝ տեսանյութում: