Ամերիկացի դերասանուհի Էլիզաբեթ Թեյլորի առանձնատունը գնել է անհայտ մի անձնավորություն: Այս մասին գրում է The Hollywood Reporter կայքը: Թեյլորն առանձնատունը գնել էր 1981 թ.-ին և այնտեղ ապրել մինչ իր մահը: Այն այս տարի մայիսին դրվել էր վաճառքի 8.6 մլն դոլարով: Թե ինչքան է վճարել գնորդը՝ հայտնի չէ:
Երկհարկանի տան մակերեսը, որը գտնվում է Լոս Անջելեսի Բել Էյր թաղամասում, կազմում է 650 քառակուսի մետր: Այն կառուցվել է 1960-ական թվականներին: Առանձնատունն ունի 5 ննջասենյակ, մի քանի լոգարան, հյուրասենյակ, ճաշասենյակ, աշխատասենյակ և տան աշխատողների համար նախատեսված սենյակ: Տան հարակից 0.5 հեկտարի վրա գտնվում է ավտոտնակը, այգին և լողավազանը:
Թեյլորը մահացել է 2011 թ.-ի մարտի 23-ին, 79 տարեկան հասակում: Դերասանուհու մահվան պատճառ է հանդիսացել սրտի անբավարարությունը:
