Սահմանադրական դատարանն այսօր գրավոր ընթացակարգով քննում էր ՀՀ երկրորդ նախագահ Ռոբերտ Քոչարյանի դիմումը Քրեական դատավարության օրենսգրքի 35-րդ հոդվածի և 135-րդ հոդվածի 2-րդ մասի սահմանադրականությանը համապատասխանության հարցը որոշելու վերաբերյալ գործը: ՍԴ աշխատակազմի ղեկավարը տեղեկացնում է, որ դատարանը Ռոբերտ Քոչարյանին կալանավորելու հիմքերի սահմանադրականության գործով որոշումը կհրապարակի վաղը՝ սեպտեմբերի 4-ին:
Թեմայի շուրջ «Առաջին լրատվական»-ի հետ քննարկմանը մասնակցեցին փաստաբան Կարապետ Բադալյանը, վերլուծաբան Հակոբ Բադալյանը և ԱԺ «Իմ քայլը» խմբակցության պատգամավոր Գայանե Աբրահամյանը:
Կարապետ Բադալյանի դիտարկմամբ՝ ՍԴ անդամները հստակ կողմնորոշում ունեն այս հարցի լուծման կապակցությամբ, և բոլորը լծված են այնպիսի լուծում գտնելու, որը քրեական պատասխանատվությունից կազատի մեղադրյալ Քոչարյանին. «Այդ մասին է վկայում նաև ՍԴ վերջին շրջանի ակտիվ գործունեությունը՝ կապված Քոչարյանի պաշտպանների բողոքների հետ… Նրանք ՔՕ 301-րդ հոդվածի հետ կապված խորհրդատվական կարծիք ստանալու համար հարցումներ ուղարկեցին Վենետիկի հանձնաժողով, ՄԻԵԴ, այսինքն՝ հստակ է, որ այդ անձինք կողմնորոշված են տալու այնպիսի լուծում, որն ուղղված կլինի Քոչարյանի պաշտպանությանը»:
Գայանե Աբրահամյանի խոսքով՝ ունենք ՍԴ, բայց չունենք ՍԴ դատավորներ, և իրավական գործընթաց իրականացնում են մարդիկ, ովքեր չունեն լիազորություններ, անկողմնակալության սկզբունքը խախտված է: «Մի քանի սկզբունքներ խախտված են, և իրավական գործընթացի մասին խոսելը բարդ է»,- նշեց պատգամավորը:
«Այստեղ գործ ունենք լայն քաղաքական շերտերի հետ, ոչ միայն նախկին իշխանություն- նոր իշխանություն պարզ դիմակայության հետ»,- նկատեց Հակոբ Բադալյանը: Քննարկման մասնակիցների կարծիքով՝ Քոչարյանի գործը չի կարելի իրավական դաշտից տեղափոխել քաղաքական դաշտ:
«ՍԴ-ն որևիցե կերպ չի կարող հարկադրաբար որոշում կայացնել, չի կարող պարտադրել Առաջին ատյանի դատարանին՝ հանել մեղադրանքը. որևիցե մեկը չի կարող հարկադրել մեր դատարաններին: Եթե ապօրինի հրաման է տրվում, ազատ ես չկատարել այն»,- նշեց Կ. Բադալյանը: Գ. Աբրահամյանը հավելեց, որ արդեն իսկ խախտվել և անտեսվել է եռաստիճան դատական համակարգը հարգելու սկզբունքը: «ՍԴ լեգիտիմությունը և հատկապես ՍԴ նախագահի լեգիտիմությունը խիստ կասկածի տակ է»,- ընդգծեց պատգամավորը:
Անդրադառնալով դիտարկմանը, որ դատարանի դիմաց Քոչարյանի աջակիցները բողոքի ակցիաներ են իրականացնում՝ Հակոբ Բադալյանը նշեց, որ դրանք նշանակալի չեն քաղաքական այն համատեքստում, որն առկա է:
Մանրամասն՝ տեսանյութում: